గతుకుల రోడ్డు మీద ప్రయాణం కష్టం, నునుపుగా ఉన్న రోడ్డు మీద వాహనాలు ఝామ్మని దూసుకుపోతాయి. దోశ పెనాన్ని బాగా విడవాలి అంటే పెనానికి, పిండికి మధ్యలో ఒక సన్నని పూత అడ్డంగా ఉండాలి. లేదంటే పెనం మీద సూక్ష్మమైన గుంతల్లో పిండి అతుక్కుపోతుంది. నాన్ స్టిక్ పెనాలకు ఆ పూత ముందే ఉంటే మాములు పెనాలకు మనం తయారుచేసుకోవాలి లేదా ఒకట్రెండు దోశలు వేయగా దానికదే ఏర్పడుతుంది.
వేడెక్కుతున్న పెనం మీద ఒక చెంచా నూనె వేసి దాన్ని అన్నివైపులా బాగా రుద్ది పూత పూస్తారు. కొంతమంది ఉల్లిపాయ చెక్క రుద్దుతారు. అప్పుడు ఉల్లిపాయ రసంతో పూత ఏర్పడుతుంది. ఈ ప్రక్రియను సీజనింగ్ అంటారు. తెలుగులో ఏమంటారో తెలీదు. ఫ్రైడ్ రైస్, నూడిల్స్ చేసేవారు కూడా ఇదే పద్ధతి అనుసరిస్తారు. పెనాన్ని తోమినప్పుడు ఆ పూత పోతుంది. అందుకే మొదటి దోశ సరిగా రాక కొంచెం మారాం చేస్తుంది. పూత పూసి బుజ్జగిస్తుండాలి.
రోళ్ల మీద చిన్న గంట్లు ఉంటాయి. బాగా వాడిన రోటి మీద ఆ గంట్లు మూసుకుపోయి నునుపుగా మారి రుబ్బేటప్పుడు పిండి నలగదు. ఒక మనిషి వచ్చి గంట్లు కొడతాడు. ఇక్కడ ఘర్షణ (Friction) కావాలి, పెనం మీద అవసరం లేదు. అందుకే ఘర్షణను అవసరమైన భూతం అంటారు.
