Balakrishna : సౌతిండియన్ సూపర్ స్టార్ రజనీకాంత్ స్టార్ డమ్ను అమాంతం పెంచిన చిత్రం ‘బాషా’. మాఫియా బ్యాక్ డ్రాప్లో, ఫ్లాష్ బ్యాక్ కథలలో కొత్త ట్రెండ్ సెట్ చేసింది ఈ చిత్రం. ఇందులో అదిరిపోయే బ్యాక్ గ్రౌండ్ మ్యూజిక్తో పాటు రజనీ నట విశ్వరూపం ఈ సినిమాను ఆల్టైమ్ హిట్స్లలో ఒకటిగా నిలిచిపోయేలా చేసింది. ఇప్పటికీ ఈ సినిమా వస్తుందంటే ఇంటిల్లిపాది టీవీలకు అతుక్కుపోయి చూస్తుంటారు. 1995 జనవరి 12న సంక్రాంతి కానుకగా రిలీజ్ అయిన బాషా వసూళ్ల దుమ్ము దులిపింది. ఈ సినిమా కథను దర్శకుడు సురేష్ కృష్ణ మెగాస్టార్ చిరంజీవికి చెప్పడంతో ఆయన రీమేక్కు గ్రీన్ సిగ్నల్ ఇచ్చారు.
అయితే రంగంలోకి దిగిన అల్లు అరవింద్.. ప్రొడ్యూసర్తో బేరానికి దిగగా, ఆ నిర్మాత తెలుగు రైట్స్ కోసం రూ.40లక్షలు డిమాండ్ చేయగా.. అరవింద్ రూ.25 లక్షలకు అడిగారట. బేరం కుదరకపోవడంతో బాషా తెలుగు రీమేక్కు సాధ్యం కాలేదు. అయితే ఈ సినిమాని బాలయ్యతో కూడా రీమేక్ చేయాలని అనుకున్నారట. తమిళ్లో భారీ విజయం సాధించిన ఈ సినిమాను నిర్మాతలు తెలుగులో కూడా చేయాలని అనుకున్నారు. దర్శకుడు సురేష్ కృష్ణ తెలుగులో ఈ చిత్రాన్ని బాలకృష్ణ తో రీమేక్ చేయాలని అనుకున్నారు.
సాధారణంగా బాలకృష్ణ రీమేక్ లకు దూరంగా ఉంటారు. ఈ నేపథ్యంలో భాషా సినిమాలో అవకాశం వచ్చినా లైట్ తీసుకున్నారు. ఒకవేళ బాలయ్య ఒప్పుకొని ఉంటే భాషా సినిమా నేరుగా తెలుగులో వచ్చి ఉండేది. అప్పుడు సినిమా బాక్సాఫీస్ని ఎంతగా షేక్ చేసి ఉండేదనేది ప్రత్యేకంగా చెప్పనక్కర్లేదు. కాగా, భాషా సినిమాలో చాలా భాగం ముంబై నేపధ్యంలో జరుగుతుంది. విలన్ తో జరిగే కొన్ని ప్రధాన సన్నివేశాలను ముంబైలోని గేట్ వే ఆఫ్ ఇండియా, హోటల్ తాజ్ ప్రాంతంలో తెరకెక్కించారు. ఏడాది పాటు ఆడిన బాషా అప్పట్లోనే ప్రపంచవ్యాప్తంగా 38 కోట్లకు పైగా వసూళ్లు చేసిందని అంచనా.
