గులాబ్ జామ్ అంటే ఇష్టపడని వారు ఎవరుంటారు చెప్పండి. చిన్న పిల్లలకు ఎంతో ఇష్టమైన ఈ రెసిపీ కొద్దిగా భిన్నంగా పన్నీర్ తో ఎంతో రుచికరమైన గులాబ్ జామ్ ఎలా తయారు చేయాలో ఇక్కడ తెలుసుకుందాం.
కావలసిన పదార్థాలు
పనీర్ తురుము ఒక కప్పు, పాల పొడి రెండు కప్పులు, రవ్వ రెండు టేబుల్ స్పూన్లు, బాదంపాలు టేబుల్ స్పూన్, గుడ్డు 1, చక్కెర ఒక కప్పు, బేకింగ్ సోడా చిటికెడు, నీళ్ళు రెండు కప్పులు, నూనె డీప్ ఫ్రైకి సరిపడినంత.
తయారీ విధానం
ముందుగా ఒక గిన్నెలో రవ్వ పనీర్ తురుము బేకింగ్ సోడా పాలపొడి గుడ్డు బాదంపాలు వేసి బాగా కలుపుకోవాలి.ఈ మిశ్రమాన్ని ఎక్కడ ఉండలు లేకుండా పేస్టులా మెత్తగా కలుపుకొని ఒక పది నిమిషాల పాటు పక్కన పెట్టుకోవాలి. ఇప్పుడు మరొక గిన్నెలో నూనె వేసి నూనె కాగిన తరువాత పనీర్ మిశ్రమాన్ని చిన్న చిన్న ఉండలుగా చేసి నూనెలో వేసి దోరగా వేయించుకోవాలి. అదేవిధంగా పంచదారతో పాకం తయారు చేసుకొని పక్కన పెట్టుకోవాలి. ఇప్పుడు దోరగా వేయించిన పన్నీర్ ఉండలను ఓ అరగంట పాటు పాకంలో వేసి సర్వ్ చేసుకుంటే ఎంతో రుచికరమైన పన్నీర్ గులాబ్ జామ్ తయారైనట్టే.
