Alu Gobi Masala Curry : మనం వంటింట్లో బంగాళాదుంపలతో, కాలీఫ్లవర్ తో రకరకాల వంటలను తయారు చేస్తూ ఉంటాం. ఇవి రెండు కూడా అనేక పోషకాలను కలిగి ఉంటాయి. వీటిని తినడం వల్ల మన శరీరానికి ఎంతో మేలు కలుగుతుంది. వీటితో వేరువేరుగానే కాకుండా వీటిని కలిపి కూడా మనం వంటలను తయారు చేయవచ్చు. చాలా మంది బంగాళాదుంపలను, కాలీఫ్లవర్ ను కలిపి వంటలను కూడా తయారు చేస్తూ ఉంటారు. అందులో భాగంగా బంగాళాదుంపలను, కాలీఫ్లవర్ ను కలిపి మసాలా కర్రీని ఎలా తయారు చేసుకోవాలి.. దీని తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
ఆలూ గోబీ మసాలా కర్రీ తయారీకి కావల్సిన పదార్థాలు..
చిన్నగా తరిగిన బంగాళాదుంప ముక్కలు – 2 కప్పులు, చిన్నగా తరిగిన కాలీఫ్లవర్ ముక్కలు – 2 కప్పులు, టమాట పేస్ట్ – ఒక కప్పు, చిన్నగా తరిగిన ఉల్లిపాయలు – అర కప్పు, చిన్నగా తరిగిన పచ్చి మిర్చి – 2, కారం – ఒకటిన్నర టీ స్పూన్, ఉప్పు – తగినంత, అల్లం వెల్లుల్లి పేస్ట్ – ఒక టీ స్పూన్, ధనియాల పొడి – ఒక టీ స్పూన్, జీలకర్ర పొడి – అర టీ స్పూన్, పసుపు – అర టీ స్పూన్, గరం మసాలా – పావు టీ స్పూన్, నూనె – 2 టేబుల్ స్పూన్స్, నీళ్లు – ఒకటిన్నర కప్పు, తరిగిన కొత్తిమీర – కొద్దిగా.
ఆలూ గోబీ మసాలా కర్రీ తయారు చేసే విధానం..
ముందుగా ఒక కళాయిలో ఒక టీ స్పూన్ నూనె వేసి వేడయ్యాక బంగాళాదుంప ముక్కలను వేసి మూత పెట్టి 5 నిమిషాల పాటు వేయించుకోవాలి. ఇందులోనే కాలీఫ్లవర్ ముక్కలను కూడా వేసి కలిపి మూత పెట్టి మరో 5 నిమిషాల పాటు వేయించి ఒక ప్లేట్ లోకి తీసుకోవాలి. అదే కళాయిలో నూనె వేసి చిన్నగా తరిగిన ఉల్లిపాయ ముక్కలను, పచ్చి మిర్చి ముక్కలను వేసి వేయించుకోవాలి. ఉల్లిపాయ ముక్కలు వేగిన తరువాత పసుపు, అల్లం వెల్లుల్లి పేస్ట్ వేసి పచ్చి వాసన పోయే వరకు వేయించాలి. ఇప్పుడు టమాట పేస్ట్ ను వేసి కలిపి మూత పెట్టి నూనె పైకి తేలే వరకు ఉడికించుకోవాలి.
తరువాత కారం, ఉప్పు, ధనియాల పొడి, జీలకర్ర పొడి వేసి కలిపి నీళ్లను పోసి ఉడికించాలి. నీళ్లు బాగా వేడయ్యాక ముందుగా వేయించి పెట్టుకున్న బంగాళాదుంప ముక్కలను, కాలీఫ్లవర్ ముక్కలను వేసి కలిపి మూత పెట్టి ఉడికించుకోవాలి. ఈ ముక్కలు పూర్తిగా ఉడికిన తరువాత గరం మసాలాను వేసి కలిపి ఒక నిమిషం పాటు ఉడికించి చివరగా కొత్తిమీరను వేసి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే అలూ గోబీ మసాలా కర్రీ తయారవుతుంది. దీనిని అన్నం, చపాతీ, పుల్కా, రోటీ వంటి వాటితో కలిపి తింటే చాలా రుచిగా ఉంటుంది. అంతేకాకుండా బంగాళాదుంపలు, కాలీఫ్లవర్ లను తినడం వల్ల కలిగే ప్రయోజనాలను, వాటిలో ఉండే పోషకాలను పొందవచ్చు.
