Catering Style Chicken Fry : చికెన్ తో చేసే వివిధ రకాల వంటకాల్లో చికెన్ ఫ్రై కూడా ఒకటి. చికెన్ ఫ్రై చాలా రుచిగా ఉంటుంది. చాలా మంది దీనిని ఇష్టంగా తింటూ ఉంటారు. సైడ్ డిష్ గా తినడానికి ఇది చాలా చక్కగా ఉంటుంది. చికెన్ ఫ్రైను వివిధ రుచుల్లో తయారు చేస్తూ ఉంటాము. కింద చెప్పిన విధంగా తయారు చేసే క్యాటరింగ్ స్టైల్ చికెన్ ఫ్రై కూడా చాలా రుచిగా ఉంటుంది. దీనిని ఎక్కువగా క్యాటరింగ్ వాళ్లు ఫంక్షన్ లలో తయారు చేస్తూ ఉంటారు. ఈ చికెన్ ఫ్రైను తయారు చేయడం కూడా చాలా సులభం. క్యాటరింగ్ స్టైల్ లో రుచిగా చికెన్ ఫ్రైను ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
క్యాటరింగ్ స్టైల్ చికెన్ ఫ్రై తయారీకి కావల్సిన పదార్థాలు..
చికెన్ మ్యారినేషన్ కు కావల్సిన పదార్థాలు..
చికెన్ – అరకిలో, ఉప్పు – తగినంత, పసుపు – పావు టీ స్పూన్, కారం – అర టీ స్పూన్, అల్లం వెల్లుల్లి పేస్ట్ – అర టీ స్పూన్, నూనె – 3 టేబుల్ స్పూన్స్, జీలకర్ర – అర టీ స్పూన్, తరిగిన ఉల్లిపాయలు – 2, తరిగిన పచ్చిమిర్చి – 3, కరివేపాకు – 3 రెమ్మలు, పెరుగు – 2 లేదా 3 టేబుల్ స్పూన్, కసూరిమెంతి – ఒక టీ స్పూన్, కారం – ఒక టీ స్పూన్, పసుపు – పావు టీ స్పూన్, ధనియాల పొడి – ఒక టీ స్పూన్, అల్లం వెల్లుల్లి పేస్ట్ – అర టీ స్పూన్, గరం మసాలా – అర టీ స్పూన్, తరిగిన కొత్తిమీర – కొద్దిగా.
క్యాటరింగ్ స్టైల్ చికెన్ ఫ్రై తయారీ విధానం..
ముందుగా కళాయిలో చికెన్ ను తీసుకోవాలి. తరువాత మ్యారినేషన్ కు కావల్సిన పదార్థాలు వేసి అరగంట పాటు మ్యారినేట్ చేసుకోవాలి. తరువాత ఈ కళాయిని స్టవ్ మీద ఉంచి చికెన్ ను వేయించాలి. చికెన్ లోని నీరంతా పోయే వరకు బాగా వేయించిన తరువాత స్టవ్ ఆఫ్ చేసుకోవాలి. తరువాత మరో కళాయిలో నూనె వేసి వేడి చేయాలి. నూనె వేడయ్యాక జీలకర్ర, ఉల్లిపాయ ముక్కలు వేసి వేయించాలి. ఉల్లిపాయ ముక్కలు వేగిన తరువాత ముందుగా వేయించిన చికెన్, పచ్చిమిర్చి, కరివేపాకు వేసి 2 నిమిషాల పాటు వేయించాలి.
తరువాత పెరుగు వేసి కలపాలి. దీనిని మరో నిమిషం పాటు వేయించిన తరువాత కసూరిమెంతి, కారం, ఉప్పు, పసుపు, ధనియాల పొడి వేసి కలపాలి. తరువాత అల్లం వెల్లుల్లి పేస్ట్ వేసి వేయించాలి. చికెన్ పూర్తిగా వేగి నూనె పైకి తేలిన తరువాత గరం మసాలా, కొత్తిమీర వేసి కలపాలి. దీనిని మరో నిమిషం పాటు వేయించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే చికెన్ ఫ్రై తయారవుతుంది. దీనిని పప్పు, సాంబార్ వంటి వాటితో తింటే మరింత రుచిగా ఉంటుంది. ఈ విధంగా తయారు చేసిన చికెన్ ఫ్రైను అందరూ ఎంతో ఇష్టంగా తింటారు.
