Egg 65 : కోడిగుడ్లను సహజంగానే చాలా మంది భిన్న రకాలుగా వండుకుని తింటుంటారు. కొందరు ఉడకబెట్టిన గుడ్లు అంటే ఇష్టంగా తింటారు. కొందరు ఆమ్లెట్లను ఇష్టపడతారు. కొందరు కోడిగుడ్ల ఫ్రై తింటారు. అయితే ఇలా కోడిగుడ్లతో చేయదగిన వెరైటీ ఆహారాల్లో ఎగ్ 65 కూడా ఒకటి. దీన్ని తయారు చేయడం సులభమే. ఇది మనకు బయట రెస్టారెంట్లలో లభిస్తుంది. కానీ కాస్త శ్రమిస్తే దీన్ని ఇంట్లోనే ఎంతో రుచిగా తయారు చేసుకోవచ్చు. ఇక ఎగ్ 65ని ఎలా తయారు చేయాలో ఇప్పుడు తెలుసుకుందాం.
ఎగ్ 65 తయారీకి కావల్సిన పదార్థాలు..
కోడిగుడ్లు – 6, అల్లం – 2 ముక్కలు, వెల్లుల్లి – 10 రెబ్బలు, పచ్చిమిర్చి – 6, కొత్తిమీర – ఒక కప్పు, కరివేపాకు – ఒక కప్పు, గరం మసాలా – 4 టీస్పూన్లు, కారం – తగినంత, కశ్మీరీ కారం పొడి (రంగు కోసం) – 1 టీ స్పూన్, ఉప్పు – తగినంత, పెరుగు – 2 కప్పులు, చిల్లీ సాస్ – కొద్దిగా, జీలకర్ర పొడి – 3 టీస్పూన్లు, చక్కెర – 2 టీస్పూన్లు, కార్న్ ఫ్లోర్ – 1 కప్పు, బ్రెడ్ పౌడర్ – కొద్దిగా.
ఎగ్ 65 తయారు చేసే విధానం..
కోడిగుడ్లను ఉడకబెట్టి వాటిల్లో ఉండే పచ్చసొన తీసేసి తెల్ల సొన మాత్రమే తీసుకుని వాటిని చిన్న చిన్న ముక్కలుగా కట్ చేసి పెట్టుకోవాలి. ఈ ముక్కలకు సన్నగా తరిగిన అల్లం, వెల్లుల్లి, పచ్చిమిర్చి ముక్కలు, కొద్దిగా కారం, గరం మసాలా, బ్రెడ్ ప్రౌడర్, కార్న్ ఫ్లోర్ వేసి కలిపి పెట్టుకోవాలి. రెండు కోడిగుడ్లను పగలగొట్టి వాటిల్లో నుంచి తెల్లసొన తీసి ఆ మిశ్రమంలో బాగా కలపాలి. తరువాత ఈ మిశ్రమాన్ని బాగా కలుపుతూ చిన్న చిన్న ఉండలుగా చేసి పెట్టుకోవాలి. పాన్లో నూనె వేసి వేడయ్యాక అందులో ఆ ఉండలను వేస్తూ వాటిని బంగారు రంగు వచ్చే వరకు వేయించాలి.
మరో పాన్లో కొద్దిగా నూనె వేసి వేడి కాగానే అందులో సన్నగా తరిగిన అల్లం, వెల్లుల్లి, పచ్చిమిరప కాయ ముక్కలు, కరివేపాకు వేసి బాగా వేయించాలి. అనంతరం అందులో పెరుగు వేసి కొద్దిగా ఉడకగానే కశ్మీరీ కారం పొడి, గరం మసాలా, జీలకర్ర పొడి, చిల్లీ సాస్ వేయాలి. చక్కెర వేస్తే రుచి బాగుంటుంది. తరువాత కొత్తిమీర వేయాలి. అనంతరం ముందుగా వేయించి పెట్టుకున్న ఉండలను వేయాలి. మంట కాస్త పెంచి ముక్కలకు గ్రేవీ బాగా పట్టేవరకు పాన్ను అటు ఇటు తిప్పాలి. బాగా కలియ బెట్టాలి. తరువాత కాసేపు ఉంచి ఫ్రై చేయాలి. మధ్య మధ్యలో కలుపుతూ ఉండాలి. చివరకు స్టవ్ ఆఫ్ చేయాలి. దీంతో ఎంతో రుచిగా ఉండే ఎగ్ 65 తయారవుతుంది. దీన్ని నేరుగా తింటే ఎంతో రుచిగా ఉంటుంది.
