Pachi Mirchi Tomato Pappu : పచ్చిమిర్చి టమాట పప్పు.. పచ్చిమిర్చి, టమాటాలు కలిపి చేసే ఈ పప్పు చాలా రుచిగా ఉంటుంది. తరుచూ చేసే టమాట పప్పు కంటే ఈ పప్పు చాలా రుచిగా ఉంటుంది. జొన్న రొట్టెతో తినడానికి ఈ పప్పు చాలా చక్కగా ఉంటుంది. దీనిని తయారు చేసయడం కూడా చాలా సులభం. కేవలం 20 నిమిషాల్లోనే ఈ పప్పును చాలా సులభంగా, రుచిగా తయారు చేసుకోవచ్చు. లొట్టలేసుకుంటూ తినాలనిపించేంత రుచిగా ఉండే ఈ పచ్చిమిర్చి టమాట పప్పును ఎలా తయారు చేసుకోవాలి.. తయారీకి కావల్సిన పదార్థాల గురించి ఇప్పుడు తెలుసుకుందాం.
పచ్చిమిర్చి టమాట పప్పు తయారీకి కావల్సిన పదార్థాలు..
కందిపప్పు – అర కప్పు, నీళ్లు – 3 కప్పులు, పచ్చిమిర్చి – 10 నుండి 15, తరిగిన పెద్ద ఉల్లిపాయ – 1, తరిగిన టమాటాలు – 3, పసుపు – అర టీ స్పూన్, ధనియాల పొడి – అర టీ స్పూన్, కరివేపాకు – ఒక రెమ్మ, తరిగిన కొత్తిమీర – 2 టేబుల్ స్పూన్స్, చింతపండు – చిన్న ఉసిరికాయంత, నూనె – ఒక టీ స్పూన్.
తాళింపుకు కావల్సిన పదార్థాలు..
నూనె – 2 టేబుల్ స్పూన్స్, తాళింపు దినుసులు – ఒక టేబుల్ స్పూన్, ఎండుమిర్చి – 3, దంచిన వెల్లుల్లి రెబ్బలు – 5, పొడుగ్గా తరిగిన ఉల్లిపాయ – 1, కరివేపాకు – ఒక రెమ్మ.
పచ్చిమిర్చి టమాట పప్పు తయారీ విధానం..
ముందుగా కుక్కర్ లో పప్పును తీసుకుని శుభ్రంగా కడగాలి. తరువాత మిగిలిన పదార్థాలను ఒక్కొక్కటిగా వేసి కుక్కర్ మూత పెట్టాలి. తరువాత ఈ పప్పును 4 నుండి 5 విజిల్స్ వచ్చే ఉడికించి స్టవ్ ఆఫ్ చేసుకోవాలి. తరువాత మూత తీసి ఉప్పు వేసి పప్పును మెత్తగా చేసుకోవాలి. తరువాత తాళింపుకు కళాయిలో నూనె వేసి వేడి చేయాలి. తరువాత తాళింపు పదార్థాలను ఒక్కొక్కటిగా వేసి వేయించాలి. తాళింపు చక్కగా వేగిన తరువాత పప్పు వేసి అంతా కలిసేలా కలుపుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే పచ్చిమిర్చి టమాట పప్పు తయారవుతుంది. దీనిని అన్నం, రోటీ వంటి వాటితో తింటే చాలా రుచిగా ఉంటుంది. ఈ విధంగా తయారు చేసిన పప్పును అందరూ ఎంతో ఇష్టంగా తింటారు.
