Restaurant Style Chicken 65 : చికెన్ తో ఎంతో రుచికరమైన వంటలను తయారు చేసుకుని తింటూ ఉంటాం. చికెన్ తో చేసే వంటకాలు రుచితో పాటు ఆరోగ్యాన్ని కూడా అందిస్తాయి. చికెన్ తో చేసుకోదగిన వంటకాల్లో చికెన్ 65 ఒకటి. ఇది మనకు రెస్టారెంట్ లలో ఎక్కువగా లభ్యమవుతుంది. చికెన్ 65 చాలా రుచిగా ఉంటుంది. రెస్టారెంట్ లలో చాలా మంది దీనిని రుచి చూసే ఉంటారు. ఎంతో రుచిగా ఉండే ఈ చికెన్ 65 ని మనం ఇంట్లో కూడా అదే రుచితో తయారు చేసుకోవచ్చు. చికెన్ 65 ని ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
రెస్టారెంట్ స్టైల్ చికెన్ 65 తయారీకి కావల్సిన పదార్థాలు..
చికెన్ – 350 గ్రా., కోడిగుడ్డు – 1, కార్న్ ఫ్లోర్ – ఒక టేబుల్ స్పూన్, మైదా పిండి – ఒక టేబుల్ స్పూన్, గరం మసాలా – ఒక టేబుల్ స్పూన్, మిరియాల పొడి – ఒక టేబుల్ స్పూన్, చిన్నగా తరిగిన వెల్లుల్లి రెబ్బలు – ఒక టేబుల్ స్పూన్, కారం – ఒక టేబుల్ స్పూన్, ఉప్పు – తగినంత, నూనె – డీప్ ఫ్రైకు సరిపడా, కరివేపాకు – ఒక రెమ్మ, నిమ్మరసం – ఒక టీ స్పూన్, పచ్చిమిర్చి – 2, అల్లం వెల్లుల్లి పేస్ట్ – ఒక టేబుల్ స్పూన్, రెడ్ ఫుడ్ కలర్ – చిటికెడు.
రెస్టారెంట్ స్టైల్ చికెన్ 65 తయారీ విధానం..
ముందుగా చికెన్ ను శుభ్రంగా కడిగి ఒక గిన్నెలోకి తీసుకోవాలి. తరువాత అందులో నూనె, కరివేపాకు, పచ్చిమిర్చి, వెల్లుల్లి రెబ్బలు తప్ప మిగిలిన పదార్థాలన్నీ వేసుకోవాలి. తరువాత దీనిపై మూత పెట్టి గంట పాటు ఫ్రిజ్ లో ఉంచాలి. తరువాత చికెన్ ను బయటకు తీసి మరోసారి అంతా కలుపుకోవాలి. తరువాత కళాయిలో నూనె పోసి వేడి చేయాలి. నూనె వేడయ్యాక చికెన్ ముక్కలను వేసి వేయించాలి. వీటిని మధ్యస్థ మంటపై కరకరలాడుతూ ఎర్రగా అయ్యే వరకు వేయించుకుని ప్లేట్ లోకి తీసుకోవాలి. తరువాత అదే నూనెలో పచ్చిమిర్చి, కరివేపాకు, వెల్లుల్లి రెబ్బలు వేసి వేయించి చికెన్ మీద చల్లుకోవాలి. ఇలా చేయడం వల్ల ఎంతో రుచిగా ఉండే చికెన్ 65 తయారవుతుంది. చికెన్ తో తరచూ చేసే వంటకాలతో పాటు అప్పుడప్పుడూ ఇలా చికెన్ 65 ను కూడా తయారు చేసుకుని తినవచ్చు. ఈ చికెన్ 65 ను ఒక్క ముక్క కూడా విడిచి పెట్టకుండా అందరూ ఇష్టంగా తింటారు.
