Aloo Meal Maker Masala Fry : మనం బంగాళాదుంపలతో రకరకాల వంటకాలను తయారు చేస్తూ ఉంటాం. బంగాళాదుంపలతో చేసుకోదగిన రుచికరమైన వంటకాల్లో ఆలూ మీల్ మేకర్ మసాలా ఫ్రై కూడా ఒకటి. బంగాళాదుంపలు, మీల్ మేకర్ కలిపి చేసే ఈ ఫ్రై చాలా రుచిగా ఉంటుంది. పప్పు, సాంబార్ వంటి వాటితో ఈ ఫ్రైను కలిపి తింటే చాలా రుచిగా ఉంటుంది. ఈ ఫ్రైను తయారు చేయడం కూడా చాలా తేలిక. రుచిగా, తేలికగా చేసుకోగలిగే ఆలూ మీల్ మేకర్ మసాలా ఫ్రైను ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
ఆలూ మీల్ మేకర్ మసాలా ఫ్రై తయారీకి కావల్సిన పదార్థాలు..
క్యూబ్స్ లాగా తరిగిన బంగాళాదుంపలు – పావు కిలో, మీల్ మేకర్ – ఒక కప్పు, పొడుగ్గా తరిగిన పెద్ద ఉల్లిపాయ – 1, తరిగిన పచ్చిమిర్చి – 2, అల్లం వెల్లుల్లి పేస్ట్ – ఒక టేబుల్ స్పూన్, ధనియాల పొడి – ఒక టేబుల్ స్పూన్, గరం మసాలా – ఒక టీ స్పూన్, పసుపు – అర టీ స్పూన్, ఉప్పు – తగినంత, కారం – ఒక టీ స్పూన్, నూనె – 2 టేబుల్ స్పూన్స్, తరిగిన కొత్తిమీర – కొద్దిగా, కరివేపాకు – ఒక రెమ్మ.
ఆలూ మీల్ మేకర్ మసాలా ఫ్రై తయారీ విధానం..
ముందుగా మీల్ మేకర్ లను 5 నిమిషాల పాటు వేడి నీటిలో ఉంచాలి. తరువాత వాటిని చేత్తో పిండి గిన్నెలోకి తీసుకోవాలి. ఇప్పుడు కళాయిలో నూనె వేసి వేడి చేయాలి. నూనె వేడయ్యాక బంగాళాదుంప ముక్కలు వేసి వేయించాలి. వీటిని మధ్యస్థ మంటపై కలుపుతూ వేయించాలి. బంగాళాదుంప ముక్కలు గోల్డెన్ బ్రౌన్ కలర్ లోకి రాగానే వాటిని ప్లేట్ లోకి తీసుకోవాలి. తరువాత అదే నూనెలో మీల్ మేకర్ వేసి వేయించాలి. వీటిని ఎర్రగా అయ్యే వరకు వేయించిన తరువాత గిన్నెలోకి తీసుకోవాలి. తరువాత అదే కళాయిలో ఉల్లిపాయ ముక్కలు వేసి వేయించాలి. తరువాత అల్లం పేస్ట్ వేసి పచ్చి వాసన పోయే వరకు వేయించాలి.
తరువాత ఉప్పు, కారం, గరం మసాలా, ధనియాల పొడి, జీలకర్ర పొడి, కరివేపాకు వేసి కలపాలి. మసాలాలన్నీ చక్కగా వేగిన తరువాత రెండు టేబుల్ స్పూన్ల నీళ్లు పోసి కలపాలి. తరువాత వేయించిన మీల్ మేకర్, బంగాళాదుంప ముక్కలు, పసుపు, కొత్తిమీర, పచ్చిమిర్చి వేసి కలపాలి. దీనిని మరో రెండు నిమిషాల పాటు వేయించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే ఆలూ మీల్ మేకర్ మసాలా ఫ్రై తయారవుతుంది. సైడ్ డిష్ గా తినడానికి ఈ ఫ్రై చక్కగా ఉంటుంది. ఒక్క ముక్క కూడా విడిచి పెట్టకుండా అందరూ దీనిని ఇష్టంగా తింటారు.
