Simple Chicken Curry : చికెన్ ఎక్కువగా తయారు చేసే వివిధ రకాల వంటకాల్లో చికెన్ కర్రీ కూడా ఒకటి. చికెన్ కర్రీ చాలా రుచిగా ఉంటుంది. దీనిని ఒక్కొక్కరు ఒక్కోలా తయారు చేస్తూ ఉంటారు. తరుచూ చేసే చికెన్ కర్రీ కంటే కింద చెప్పిన విధంగా తయారు చేసే చికెన్ కర్రీ చాలా రుచిగా ఉంటుంది. దీనిని ఎక్కువ వంట గిన్నెలు వాడే పని లేకుండా కేవలం ఒక కళాయిలోనే తయారు చేసుకోవచ్చు. అలాగే వంటరాని వారు, బ్యాచిలర్స్ కూడా దీనిని సులభంగా తయారు చేసుకోవచ్చు. దీనిని తయారు చేసుకోవడానికి ఎక్కువగా శ్రమించాల్సిన అవసరం లేదు. అన్ని కలిపి కళాయిలో వేస్తే చాలు. అంత సులభంగా ఈ చికెన్ కర్రీని తయారు చేసుకోవచ్చు. శ్రమ లేకుండా చాలా సులభంగా రుచికరమైన చికెన్ కర్రీని ఎలా తయారు చేసుకోవాలో ఇప్పుడు తెలుసుకుందాం.
చికెన్ కర్రీ తయారీకి కావల్సిన పదార్థాలు..
నూనె – 2 లేదా 3 టేబుల్ స్పూన్స్, చిన్నగా తరిగిన పచ్చిమిర్చి – 10, ఎండుకొబ్బరి పొడి – 2 టేబుల్ స్పూన్స్, చికెన్ – ముప్పావుకిలో, ఉప్పు – తగినంత, కారం – 2 లేదా 3 టేబుల్ స్పూన్స్, పసుపు – పావు టీ స్పూన్, ధనియాల పొడి – ఒక టేబుల్ స్పూన్, జీలకర్ర పొడి – అర టీ స్పూన్, మిరియాల పొడి – అర టీ స్పూన్, యాలకుల పొడి – పావు టీ స్పూన్, చికెన్ మసాలా – ఒక టేబుల్ స్పూన్, వేయించిన జీడిపప్పు పొడి – 2 టేబుల్ స్పూన్, పెరుగు – అర కప్పు, అల్లం వెల్లుల్లి పేస్ట్ – ఒక టేబుల్ స్పూన్, నిమ్మరసం – అర చెక్క, కొత్తిమీర- కొద్దిగా, ఫ్రైడ్ ఆనియన్స్ – ఒక కప్పు, వేడి నీళ్లు – తగినన్ని.
చికెన్ కర్రీ తయారీ విధానం..
ముందుగా కళాయిలో నూనె వేసి వేడి చేయాలి. తరువాత పచ్చిమిర్చి వేసి వేయించాలి. తరువాత ఎండు కొబ్బరి పొడి వేసి వేయించి స్టవ్ ఆఫ్ చేసుకోవాలి. తరువాత ఈ కళాయిని పక్కకు తీసి అందులో చికెన్ వేసుకోవాలి. తరువాత వేడి నీళ్లు తప్ప మిగిలిన పదార్థాలన్నీ వేసి మసాలాలు ముక్కలకు పట్టేలా బాగా కలుపుకోవాలి. దీనిని పావు గంట పాటు పక్కకు ఉంచాలి. తరువాత ఈ కళాయిని స్టవ్ మీద ఉంచి మూత పెట్టి పెద్ద మంటపై 5 నిమిషాల పాటు ఉడికించాలి. తరువాత మంటను చిన్నగా చేసి మధ్య మధ్యలో కలుపుతూ మరో 15 నిమిషాల పాటు ఉడికించాలి. తరువాత వేడి నీళ్లు పోసి కలపాలి. దీనిపై మూత పెట్టి చికెన్ మెత్తగా అయ్యే వరకు ఉడికించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే చికెన్ కర్రీ తయారవుతుంది. ఇలా చాలా సులభంగా, చాలా తేలికగా చికెన్ కర్రీని తయారు చేసి తీసుకోవచ్చు. ఈ చికెన్ కర్రీని అందరూ ఎంతో ఇష్టంగా తింటారు.
