Vankaya Pappu : మనం ఆహారంగా తీసుకునే కూర‌గాయ‌ల్లో వంకాయ ఒక‌టి. వీటితో ర‌క‌ర‌కాల వంట‌ల‌ను త‌యారు చేసుకుని తింటూ ఉంటాం. వంకాయ‌ల్లో కూడా మ‌న శ‌రీరానికి అవ‌స‌ర‌మ‌య్యే పోష‌కాలు ఎన్నో ఉంటాయి. ఈ వంకాయ‌ల‌తో చేసుకోద‌గిన వంట‌కాల్లో వంకాయ ప‌ప్పు కూడా ఒక‌టి. వంకాయ ప‌ప్పు చాలా రుచిగా ఉంటుంది. ఇత‌ర కూర‌గాయ‌ల వ‌లే వంకాయ‌ల‌తో కూడా మనం ప‌ప్పును త‌యారు చేసుకోవ‌చ్చు. వంకాయ ప‌ప్పును ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
వంకాయ ప‌ప్పు త‌యారీకి కావ‌ల్సిన ప‌దార్థాలు..
వంకాయ‌లు – 200 గ్రా., కందిప‌ప్పు – 150 గ్రా., త‌రిగిన ట‌మాటాలు – 2, త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, కారం – ఒక టేబుల్ స్పూన్, తాళింపు గింజ‌లు – ఒక టేబుల్ స్పూన్, ఎండుమిర్చి – 1, ప‌సుపు – అర టీ స్పూన్, ఇంగువ – పావు టీ స్పూన్, ఉప్పు – త‌గినంత, నాన‌బెట్టిన చింతపండు – 5 గ్రా., నూనె – రెండు టేబుల్ స్పూన్స్, క‌రివేపాకు – ఒక రెమ్మ, త‌రిగిన కొత్తిమీర – కొద్దిగా, క‌చ్చా ప‌చ్చ‌గా దంచిన వెల్లుల్లి రెబ్బ‌లు – 5.
వంకాయ ప‌ప్పు త‌యారీ విధానం..
ముందుగా కుక్క‌ర్ లో కందిప‌ప్పును వేసి శుభ్రంగా క‌డ‌గాలి. త‌రువాత ఒక గ్లాస్ నీళ్లు, పావు టీ స్పూన్ ప‌సుపును వేసి మూత పెట్టి 3 విజిల్స్ వ‌చ్చే వరకు ఉడికించుకోవాలి. ఇలా ఉడికించుకున్న త‌రువాత ప‌ప్పును మెత్త‌గా చేసుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు గింజ‌ల‌ను, ఎండుమిర్చిని, క‌చ్చాప‌చ్చాగా దంచిన వెల్లుల్లి రెబ్బ‌ల‌ను వేసి వేయించాలి. త‌రువాత ఇంగువ, క‌రివేపాకు వేసి వేయించాలి. త‌రువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. ఇవి వేగిన త‌రువాత వంకాయ ముక్క‌లు, ప‌సుపు, ఉప్పు వేసి క‌ల‌పాలి. త‌రువాత దీనిపై మూత పెట్టి మ‌ధ్య‌స్థ మంట‌పై వంకాయ ముక్క‌ల‌ను వేయించుకోవాలి. వంకాయ ముక్క‌లు వేగిన త‌రువాత టమాట ముక్క‌లు వేసి వేయించాలి.
టమాట ముక్క‌లు మెత్త‌గా అయిన త‌రువాత అందులో కారం వేసి క‌ల‌పాలి. త‌రువాత ఇందులో ఉడికించిన ప‌ప్పు, చింతపండు ర‌సం వేసి క‌ల‌పాలి. త‌రువాత దీనిపై మూత పెట్టి మ‌రో 10 నిమిషాల పాటు ఉడికించాలి. చివ‌ర‌గా కొత్తిమీర చ‌ల్లి స్టవ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే వంకాయ ప‌ప్పు త‌యార‌వుతుంది. వేడి వేడి అన్నం, నెయ్యితో క‌లిపి ఈ ప‌ప్పును తింటే చాలా రుచిగా ఉంటుంది. వంకాయ‌ల‌తో త‌ర‌చూ చేసే వంట‌ల‌తో పాటు ఇలా ప‌ప్పును కూడా త‌యారు చేసుకుని తిన‌వ‌చ్చు.
