Vankaya Vepudu : మనం ఆహారంగా తీసుకునే కూరగాయల్లో వంకాయలు ఒకటి. వంకాయలను చాలా మంది ఇష్టంగా తింటారు. వంకయాలతో చేసే కూరలను తినడం వల్ల రుచితో పాటు ఆరోగ్యాన్ని కూడా పొందవచ్చు. ఈ వంకాయలతో ఎక్కువగా మనం వేపుడును తయారు చేస్తూ ఉంటాం. అన్నంతో కలిపి తింటే వంకాయ వేపుడు కూర చాలా రుచిగా ఉంటుంది. తరచూ చేసే వంకాయ వేపుడు కంటే కింద చెప్పిన విధంగా చేసే వంకాయ వేపుడు మరింత రుచిగా ఉంటుంది. దీనిని తయారు చేయడం కూడా చాలా సులభం. బ్యాచిలర్స్, వంటరాని వారు కూడా ఈ వేపుడు కూరను సులభంగా చేయవచ్చు. మరింత రుచిగా, సలుభంగా వంకాయ వేపుడును ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
వంకాయ ఫ్రై తయారీకి కావల్సిన పదార్థాలు..
వంకాయలు – పావు కిలో, వేయించి పొట్టు తీసిన పల్లీలు – 2 టేబుల్ స్పూన్స్, వెల్లుల్లి రెబ్బలు – 10, ఎండుమిర్చి – 7, నువ్వులు – ఒక టేబుల్ స్పూన్, సన్నగా పొడుగ్గా తరిగిన ఉల్లిపాయ – 1, తరిగిన పచ్చిమిర్చి – 2, తాళింపు దినుసులు – ఒక టేబుల్ స్పూన్, పసుపు – అర టీ స్పూన్, ఉప్పు – తగినంత, నూనె – 2 టేబుల్ స్పూన్స్, కొత్తిమీర – కొద్దిగా, కరివేపాకు – ఒక రెమ్మ.
వంకాయ ఫ్రై తయారీ విధానం..
ముందుగా వంకాయలను చిన్న ముక్కలుగా తరిగి ఉప్పు నీటిలో వేసుకోవాలి. తరువాత జార్ లో ఎండుమిర్చి, 6 వెల్లుల్లి రెబ్బలు, నువ్వులు, పల్లీలు వేసి మరీ మెత్తగా కాకుండా మిక్సీ పట్టుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక తాళింపు దినుసులు, ఎండుమిర్చి, కరివేపాకుతో పాటు వెల్లుల్లి రెబ్బలను కచ్చా పచ్చాగా దంచుకుని వేసుకోవాలి. ఇవి అన్నీ వేగిన తరువాత పచ్చిమిర్చి, ఉల్లిపాయ ముక్కలు వేసి వేయించాలి. ఉల్లిపాయ ముక్కలు వేగిన తరువాత వంకాయ ముక్కలు, ఉప్పు, పసుపు వేసి కలపాలి. తరువాత దీనిపై మూత పెట్టి మధ్య మధ్యలో కలుపుతూ వంకాయ ముక్కలను పూర్తిగా వేయించాలి. తరువాత మూత తీసి మరో రెండు నిమిషాల పాటు వంకాయ ముక్కలను వేయించాలి.
ఇలా వేయించిన తరువాత ముందుగా మిక్సీ పట్టుకున్న పొడిని వేసి కలపాలి. దీనిని మరో మూడు నిమిషాల పాటు వేయించి కొత్తిమీరను చల్లుకుని స్టవ్ ఆఫ్ చేసుకోవాలి.ఇలా చేయడం వల్ల ఎంతో రుచిగా ఉండే వంకాయ వేపుడు తయారవుతుంది. దీనిని అన్నం, చపాతీ వంటి వాటితో కలిపి తింటే చాలా రుచిగా ఉంటుంది. తరచూ చేసే వంకాయ వేపుడు కంటే ఈ విధంగా చేసిన వంకాయ వేపుడు మరింత రుచిగా ఉంటుంది. దీనిని పిల్లలతో పాటు అందరూ ఇష్టంగా తింటారు.
