Rayalaseema Chicken Curry : మాంసాహార ప్రియులకు చికెన్ రుచి గురించి ప్రత్యేకంగా చెప్పవలసిన పని లేదు. చికెన్ ను మనలో చాలా మంది ఇష్టంగా తింటారు. చికెన్ తో చేసే ఏ వంటకమైనా చాలా రుచిగా ఉంటుంది. మనం ఎక్కువగా చికెన్ తో చికెన్ కర్రీని వండుతూ ఉంటాం. చికెన్ కర్రీ కూడా చాలా రుచిగా ఉంటుంది. అలాగే మనం దీనిని వివిధ రుచుల్లో తయారు చేస్తూ ఉంటాం. అన్నం, చపాతీ ఇలా దేనితోనైనా తినడానికి ఈ చికెన్ కర్రీ చక్కగా ఉంటుంది. అందరికి నచ్చేలా చికెన్ తో రాయలసీమ స్టైల్ లో కర్రీని ఎలా తయారు చేసుకోవాలి.. తయారీకి కావల్సిన పదార్థాలు ఏమిటి.. అన్న వివరాలను ఇప్పుడు తెలుసుకుందాం.
చికెన్ కర్రీ తయారీకి కావల్సిన పదార్థాలు..
చికెన్ – పావు కిలో, తరిగిన ఉల్లిపాయలు – 2, తరిగిన టమాట – 1, తరిగిన పచ్చిమిర్చి – 4, పసుపు – అర టీ స్పూన్, తరిగిన కొత్తిమీర – కొద్దిగా, నూనె – ఒక టేబుల్ స్పూన్, కరివేపాకు – ఒక రెమ్మ, ఉప్పు – తగినంత, అల్లం వెల్లుల్లి పేస్ట్ – అర టేబుల్ స్పూన్, కారం – ఒక టేబుల్ స్పూన్.
మసాలా దినుసులు..
ధనియాలు – ఒక టేబుల్ స్పూన్, ఎండు కొబ్బరి – రెండు ఇంచుల ముక్క, లవంగాలు – 4, దాల్చిన చెక్క – ఒక చిన్న ముక్క, జీలకర్ర – ఒక టీ స్పూన్, మిరియాలు – ఒక టీ స్పూన్, ఎండుమిర్చి – 1.
చికెన్ కర్రీ తయారీ విధానం..
ముందుగా ఒక కళాయిలో మసాలా దినుసులు వేసి దోరగా వేయించాలి. తరువాత వీటిని జార్ లోకి తీసుకుని మెత్తగా పొడిగా చేసుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక ఉల్లిపాయ ముక్కలు, పచ్చిమిర్చి వేసి వేయించాలి. ఉల్లిపాయ ముక్కలు వేగిన తరువాత అల్లం వెల్లుల్లి పేస్ట్, టమాట ముక్కలు వేసి కలపాలి. టమాట ముక్కలు మెత్తగా అయ్యే వరకు వేయించిన తరువాత చికెన్ వేసి కలపాలి. దీనిని 5 నిమిషాల పాటు పెద్ద మంటపై ఉడికించిన తరువాత ఉప్పు, కారం, పసుపు, మిక్సీ పట్టుకున్న మసాలా పొడి వేసి కలపాలి. తరువాత మరో 4 నిమిషాల పాటు ఉడికించిన తరువాత రెండు గ్లాసుల నీళ్లు పోసి కలపాలి.
ఇప్పుడు దీనిపై మూత పెట్టి అర గంట పాటు ఉడికించాలి. ఇలా ఉడికించిన తరువాత కొత్తిమీర, కరివేపాకు వేసి కలపాలి. దీనిని మరో రెండు నిమిషాల పాటు ఉడికించి స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే చికెన్ కర్రీ తయారవుతుంది. దీనిని అన్నం, రాగి సంగటితో కలిపి తింటే చాలా రుచిగా ఉంటుంది. ఈ విధంగా తయారు చేసిన చికెన్ కర్రీని అందరూ ఎంతో ఇష్టంగా తింటారు. తరచూ చేసే చికెన్ కర్రీ కంటే ఈ విధంగా తయారు చేసిన చికెన్ కర్రీ మరింత రుచిగా ఉంటుంది.
