యోగాలో అనేక ఆసనాలు ఉన్నాయి. ఒక్కో ఆసనం వేయడం వల్ల భిన్న రకాల ఫలితాలు కలుగుతాయి. అయితే అందరూ రోజూ అన్ని ఆసనాలను వేయలేరు. కనుక తమకు ఉన్న అనారోగ్య సమస్యలను బట్టి కొన్ని వ్యాయామాలను మాత్రం రోజూ చేస్తారు. అలాగే అనారోగ్య సమస్యలకు అనుగుణంగా యోగా ఆసనాలను కూడా వేస్తుంటారు. ఈ క్రమంలోనే అలా రోజూ వేయాల్సిన ముఖ్యమైన ఆసనాల్లో ఒక ఆసనం గురించి ఇప్పుడు తెలుసుకుందాం.
నిత్యం వెన్ను నొప్పితో బాధపడుతున్నవారు, తొడలు, కండరాలు, కాళ్లు, నడుం నొప్పితో బాధపడుతున్నవారు, కంప్యూటర్లపై ఎక్కువగా పనిచేసేవారు రోజూ గోముఖాసనం వేయాలి. దీంతో అనేక నొప్పుల నుంచి ఉపశమనం లభిస్తుంది. ఈ ఆసనాన్ని వేయడం కూడా చాలా సులభమే. అది ఎలాగంటే..
ముందుగా నేలపై పద్మాసనం వేసి కూర్చోవాలి. తరువాత కుడి కాలును మోకాలు వద్ద వంచి దాన్ని ఎడమ తొడ మీదుగా తీసుకురావాలి. తరువాత కుడి పాదం ఎడమ తొడ పక్కన వచ్చేట్లు పెట్టాలి. అలాగే ఎడమ కాలును మోకాలు వద్ద వంచి దాన్ని కుడి కాలు తొడ కిందుగా తీసుకెళ్లాలి. ఎడమ కాలి పాదం కుడి కాలి పిరుదు కింద వచ్చేలా చూసుకోవాలి.
వెన్నెముకను నిటారుగా ఉంచాలి. కుడిచేయిని పైకి లేపి భుజం నుంచి వెనక్కి తీసుకుని తల వెనకగా పెట్టాలి. ఎడమ చేయిని వెనక్కి తీసుకెళ్లి కుడి చేయి వేళ్లతో ఎడమ చేయి వేళ్లను పట్టుకోవాలి. ఇలా వీలైనంత సేపు ఉండాలి. తరువాత సాధారణ స్థితికి రావాలి.
ఈ ఆసనాన్ని రోజూ ఉదయం ఖాళీ కడుపుతో చేయాలి. వీలైనన్ని సార్లు సౌకర్యానికి అనుగుణంగా చేయవచ్చు. ఈ ఆసనం వేయడం వల్ల అనేక లాభాలు కలుగుతాయి.
గోముఖాసనం వేయడం వల్ల తొడ కండరాలు దృఢంగా, ఆరోగ్యంగా ఉంటాయి. కాళ్ల మడమలు, తొడలు, భుజాలు, చంకలు, ఛాతి భాగాలకు శక్తి లభిస్తుంది. ఆయా భాగాల్లో ఉండే నొప్పులు తగ్గుతాయి. వెన్నెముక దృఢంగా మారుతుంది. వెన్ను నొప్పి తగ్గుతుంది. పొట్ట కండరాలు దృఢంగా మారుతాయి. పొట్ట దగ్గర, తొడలు, పిరుదుల దగ్గర ఉండే కొవ్వు కరుగుతుంది. తొడలు, మోకాళ్ల వద్ద కీళ్లు దృఢంగా మారుతాయి.
సయాటికా సమస్య ఉన్నవారు జాగ్రత్తగా ఈ ఆసనాన్ని వేయాల్సి ఉంటుంది. తీవ్రమైన మెడ, భుజాల నొప్పి సమస్య ఉన్నవారు, గర్భిణీలు, మోకాలి సమస్యలు ఉన్నవారు ఈ ఆసనాన్ని వేయరాదు.
