గురువారం అనేది వారంలో 5వ రోజు. ఇది బుధవారంనకు, శుక్రవారంనకు మధ్యలో ఉంటుంది. గురువారాన్ని లక్ష్మీవారం, బేస్తవారం అని కూడా పిలుస్తారు. ఇది గురు గ్రహం (బృహస్పతి) పేరు మీదుగా గురువారం అయింది. హిందూమతంలో గురువారం ఒక ప్రత్యేక రోజుగా పరిగణించబడుతుంది. ఇది విష్ణువుకు అంకితం చేసిన వారపు రోజు. పురాణాల ప్రకారం విశ్వం సంరక్షకులు త్రిమూర్తులు అని భావించే వారిలో విష్ణువు ఒకరు. గురువారం లేదా గురువార్ ను సాధారణంగా బృహస్పతి వార్ అని పిలుస్తారు. ఎందుకంటే ఇది విష్ణువు, బృహస్పతి (దేవతల గురువుల) కు అంకితం చేయబడింది. గురువారం గురువులకు ప్రీతికరమైన రోజు. ఈరోజు షిరిడి సాయిబాబా భక్తులకు ఎంతో పవిత్రమైంది. ఆయుష్షు, ఆరోగ్యం కోరుకునేవారు నమ్మకంతో కొంతమంది భక్తులు ఈరోజు దక్షిణ మూర్తికి లేదా సాయిబాబాకు పాలతో అభిషేకం చేస్తారు.
కొన్ని ప్రాంతాలలోని ప్రజలు గురువారం హనుమాన్ ఆలయాన్ని సందర్శిస్తారు. కొంతమంది ప్రతి గురువారం సాయంత్రం పూట ఉపవాసం పాటిస్తారు. గురువారాలు ఆరాధనకు ఉత్తమమైన రోజులుగా పరిగణించబడతాయి. ఈరోజు దేవతలను ఆరాధించడం వల్ల కడుపుని ప్రభావితం చేసే వ్యాధుల నుండి ఉపశమనం లభిస్తుంది. తన పాపాలను ఈరోజు ఒకరికి సహాయపడటం ద్వారా నివారించవచ్చును. బలం, శౌర్యం, దీర్ఘాయువు మొదలైనవి పొందడంలో సహాయపడుతుంది. పిల్లలు లేని వారికి, మంచి విద్యకు శుభాలు కలుగుతాయి.
దేవతల గురువైన బృహస్పతి పేరు మీదుగా వచ్చిన వారం గురువారం. గురువారాన్ని సంస్కృతంలో బృహస్పతి వారం అని కూడా అంటారు. దేవతల గురువు బృహస్పతి కాబట్టి సూర్యుడి నుండి 5వ గ్రహము, సౌరమండలములోనే అతి పెద్ద గ్రహం అయిన గ్రహాన్ని బృహస్పతి గ్రహము లేదా గురు గ్రహము అని అంటారు. గ్రహాల పేర్లమీద ఏడు వారాల పేర్లు వచ్చాయి కాబట్టి వారంలో అయిదవ రోజును బృహస్పతి దినమని, బృహస్పతి వారమని అంటారు. అయితే, బృహస్పతి అన్న పదానికి ప్రాకృతాల్లో బిహప్పాయ్- అని బిహస్త-/బిహస్తయ- అని రూపాంతరాలు ఉన్నాయి. తెలుగులో -హ-కారం లేదు కాబట్టి బిహస్త- > బియస్త > బేస్త గా మారుతుంది. అందుకే బృహస్పతి వారం బేస్తవారం అయ్యింది.
బృహస్పతి వార > బిహస్త వార > బియస్తవార > బేస్తవార > బేస్తార…. అంతే తప్ప బేస్తవారానికి చేపలు పట్టేవారు, పల్లకీ మోసేవారు అయిన బెస్త కులం వారికి ఏ రకమైన సంబంధం లేదన్న మాట.
