హెల్త్, ఫిట్‌నెస్ అనేది జీవితానికి చాలా ముఖ్యం. అధిక బరువు.. ఎన్నో ప్రాణాంతక సమస్యల్ని పెంచుతుంది. దీని కారణంగా చాలా ఇబ్బందులు ఎదురవుతాయి. అందుకే కచ్చితంగా బరువు తగ్గాలి. నిపుణుల ప్రకారం బరువు తగ్గాలంటే మెటబాలిజం సరిగ్గా ఉండాలి. బేసల్ మెటబాలిక్ రేట్(BMR) బరువు విషయంలో కీ రోల్ పోషిస్తుంది. BMR సరిగ్గా ఉండేందుకు శక్తి అవసరం. ఇది ఓ వ్యక్తి మొత్తం కేలోరీ అవసరాలలో అతి పెద్ద భాగం. మీరు ఓ విషయాన్ని గమనించే ఉంటారు. ఓ ఇద్దరు వ్యక్తులు కూడా ఒకే విధమైన వర్కౌట్ చేసి డైట్ పాటించినా ఒకే విధంగా బరువు తగ్గరు. దీనికి కారణం వారి BMR. ఇది ఒక్కో వ్యక్తిలో ఒక్కోలా ఉంటుంది. దీనిని సరిగ్గా మెంటెయిన్ చేయాలంటే సరైన పోషకాహారం, కేలరీల వినియోగం అవసరం అని చెబుతున్నారు నిపుణులు. ఇందుకోసం కొన్ని జాగ్రత్తలు తీసుకోవాలి. అవేంటో ఇప్పుడు చూద్దాం. మంచి ఆహారం చాలా ముఖ్యం కాబట్టి, ప్రోటీన్, ఫైబర్, విటమిన్స్ ఎక్కువగా ఉన్న ఫుడ్స్ ఎక్కువగా తీసుకోవాలి. వీటి వల్ల బాడీకి అవసరమైన పోషకాలన్నీ అందుతాయి. జీవక్రియని వేగవంతం చేయడంలో చాలా వరకూ ఈ పోషకాలన్నీ హెల్ప్ చేస్తాయి. కాబట్టి, మంచి పోషకాహారం తీసుకోవడం మరువొద్దు.
ప్రోటీన్ ఆరోగ్యానికి చాలా మంచిది. బరువు తగ్గేవారికి మరీ మంచిది. అందుకే కచ్చితంగా ప్రోటీన్ తీసుకుని, తగినంత నీరు తీసుకుంటూ వర్కౌట్ చేస్తే బీఎమ్‌ఆర్ సరిగ్గా ఉంటుంది. శరీరం సరిగ్గా పనిచేసేందుకు కచ్చితమైన పోషకాహారం చాలా ముఖ్యం. చాలా మంది బరువు తగ్గాలంటే ముందుగా తిండిని మానేస్తారు. కానీ, ఇది సరైనది కాదు.. బాడీకి ఏం కావాలో దానిని సరైన మోతాదులో తినడం మంచిది. దీని వల్ల జీవక్రియ మెరుగ్గా మారుతుంది. ముఖ్యంగా, ప్రోటీన్ ఆధారిత ఫుడ్ తినాలి. నీరు ఎక్కువగా తాగాలి. వీటితో పాటు కార్బోనేటెడ్ డ్రింక్స్, ఆల్కహాల్, పిండి పదార్థాలు, ఫ్యాట్ ఫుడ్స్, జంక్ ఫుడ్స్‌‌కి దూరంగా ఉండాలి. దీని కారణంగా త్వరగా బరువు తగ్గుతారు. జంక్ ఫుడ్స్ తినొద్దొని చెబుతారు. దీనికి కారణం లేకపోలేదు. ఇవి బరువుని పెంచడం మాత్రమే కాదు. గుండెకి కూడా అస్సలు మంచివి కాదు. మీ బాడీకి పోషకాలు ఎంత అవసరమో.. జంక్ ఫుడ్ అంత కీడుని చేస్తాయి. కాబట్టి వీటికి ఎంత దూరంగా ఉంటే అంత మంచిదని వరల్డ్ హెల్త్ ఆర్గనైజేషన్ చెబుతోంది. వీటిని తీసుకోవడం వల్ల కడుపులో మంట ఏర్పడి జీర్ణ సమస్యలు పెరగడంతో పాటు జీవక్రియ కూడా తగ్గుతుంది.
వర్కౌట్ అనేది బాడీకి చాలా ముఖ్యం. ఇది మీ బలాన్ని పెంచడమే కాకుండా జీవక్రియను మెరుగ్గా మారుస్తుంది. రెసిస్టెన్స్ ట్రైనింగ్ తీసుకోవాలి. వాకింగ్, రన్నింగ్ వంటి కార్డియో వర్కౌట్స్ కూడా బాడీకి అవసరమే. మీకు ఏది వీలవుతుందో దానిని రోజుకి కనీసం 30 నిమషాలైనా చేయాలని గుర్తుపెట్టుకోండి. ఒత్తిడి ఆరోగ్యానికి ఎప్పుడు మంచిది కాదు. జీవక్రియ మందగించడంలో ఇది కూడా కారణమని క్లినికల్ రీసెర్చ్ చెబుతోంది. దీర్ఘకాలిక ఒత్తిడి బీటాట్రోఫిన్ ఉత్పత్తిని ప్రేరేపిస్తుంది. ఇది కొవ్వుని కరిగించేందుకు ఎంజైమ్‌ని నిరోధించే ప్రోటీన్. దీని వల్ల జీవక్రియ సరిగ్గా ఉండక బరువు తగ్గరు. కాబట్టి, బరువు తగ్గాలనుకునే ఎవరైనా ఒత్తిడికి గురి కాకుండా మెడిటేషన్, ఎనిమిది గంటల నిద్ర, ఎలక్ట్రానిక్ గ్యాడ్జెట్స్‌కి దూరంగా ఉండడం స్క్రీన్ బ్రేక్ తీసుకోవడం చాలా ముఖ్యం. దీని వల్ల ఒత్తిడి చాలా వరకూ తగ్గుతుంది.
నిద్రని చాలా మంది తేలిగ్గా తీసుకుంటారు. కానీ, మనిషి ఆరోగ్యానికి నిద్ర అనేది చాలా ముఖ్యం. కచ్చితంగా 8 గంటలు నిద్రపోవడం వల్ల బాడీ ఫుల్ రీచార్జ్ అవుతుంది. ఇది మీ జీవక్రియ హెల్దీగా ఉండేందుకు హెల్ప్ చేస్తుంది. జీవక్రియ రేటును మెరుగుపరచడానికి సరైన ఆహారం, మంచి వర్కౌట్‌తో పాటు, నిద్ర కూడా చాలా అవసరమని చెబుతున్నారు నిపుణులు. దీనివల్ల బరువు తగ్గడం అవుతుంది. ముందుగా చెప్పుకున్నట్లు ఒక్కొక్కరి బాడీ తత్వం ఒక్కోలా ఉంటుంది. అందుకే మీ బాడీకి ఏం సూట్ అవుతుంది. ఎలాంటి ఆహారం తీసుకోవాలి. ఎలాంటి వర్కౌట్ చేయాలనేది తెలుసుకుని వాటిని పాటించడం వల్ల త్వరగా బరువు తగ్గుతారు. ఇందుకోసం మీరు డైటీషియన్‌ని సంప్రదించొచ్చు.
