పాప్కార్న్.. పిల్లలు, పెద్దలు అనే తారతమ్యం లేకుండా ప్రతి ఒక్కరూ ఇష్టపడే ఆహార పదార్థాల్లో ఇదీ ఒకటి. సినిమా అనగానే ఠక్కున గుర్తుకొచ్చే స్నాక్ ఐటమ్ కూడా ఇదే. పాప్కార్న్ తినడం ద్వారా మంచి టైం పాస్ కూడా అవుతుంది. మరి వీటిని తినడం వల్ల మన శరీరంలో ఏం జరుగుతుందో ఎప్పుడైనా ఆలోచించారా? నో అంటే మాత్రం.. ఈ స్టోరీపై ఓ లుక్కేయండి. పాప్కార్న్లో విటమిన్ బి కాంప్లెక్స్, మెగ్నీషియం, యాంటీ ఆక్సిడెంట్లు, మాంగనీస్, ఫైబర్ పుష్కలంగా ఉంటాయి. ఇవి మన శరీరానికి ఎంతో మేలు చేస్తాయి. ఈ పాప్కార్న్లు తినడం వల్ల పలు ఆరోగ్య ప్రయోజనాలు ఉన్నాయి. అలాగే వీటిని తినడం వల్ల కొన్ని నష్టాలు కూడా ఉన్నాయి. మరి ప్రయోజనాలు చూస్తే.. పాప్కార్న్లో ఫైబర్ అధికంగా ఉంటుంది. ఇది రక్త నాళాలు, ధమనుల గోడల్లో పేరుకుపోయిన కొలెస్ట్రాల్ను కరిగిస్తుంది. దీంతో గుండె పోటు, స్ట్రోక్ వంటి ప్రమాదాలను తగ్గిస్తుంది.
2017లో Journal of Nutritionలో ప్రచురితమైన అధ్యయనం ప్రకారం.. ఇంట్లో తయారు చేసుకున్న పాప్కార్న్ తినే వ్యక్తులకు చెడు కొలెస్ట్రాల్ స్థాయిలు 4.7% తగ్గినట్లు అలాగే మంచి కొలెస్ట్రాల్ పెరిగినట్లు కనుగొన్నారు. ఈ పరిశోధనలో పెన్సిల్వేనియా స్టేట్ యూనివర్శిటీలో పోషకాహార శాస్త్ర ప్రొఫెసర్ డాక్టర్ పెన్గో జాంగ్ పాల్గొన్నారు. పాప్కార్న్.. జీర్ణక్రియకు సహాయపడే అన్ని రకాల ఫైబర్లను కలిగి ఉంటుంది. ఇది ప్రేగు కదలికలకు సరైన రీతిలో సహాయపడుతుందని.. మలబద్ధకాన్ని కూడా తగ్గిస్తుందని అంటున్నారు. పాప్కార్న్ రక్తంలో చక్కెర స్థాయిలను నియంత్రించడంలో సహాయపడుతుందని కొన్ని పరిశోధనలు సూచిస్తున్నాయి. ఒక పరిశోధనలో, పాప్కార్న్ తినే డయాబెటిక్ రోగులకు రక్తంలో చక్కెర స్థాయిలు తక్కువగా ఉన్నాయని కనుగొన్నారు. పాప్కార్న్లో కేలరీలు తక్కువగా, ఫైబర్ ఎక్కువగా ఉండటం వల్ల బరువు నియంత్రణలో ఉండటానికి సహాయపడుతుందని నిపుణులు అంటున్నారు. ఫైబర్ ఎక్కువ సేపు కడుపు నిండిన భావాన్ని కలిగిస్తుందని.. తద్వారా తక్కువ తినడానికి సహాయపడుతుందని చెబుతున్నారు.
పైన చెప్పిన ఆరోగ్య ప్రయోజనాలు కలగాలంటే పాప్కార్న్లో వేరే పదార్థాలు ఏమి కలపకుండా ప్లెయిన్గానే తినాలి. టేస్ట్ కోసం చీజ్, బటర్, ఎక్కువ మొత్తంలో ఉప్పు వంటివి వేస్తే నష్టాలు తప్పవంటున్నారు. అవేంటంటే.. ప్లెయిన్ పాప్కార్న్లో కేలరీలు తక్కువగా ఉంటాయి. అయితే.. సినిమా థియేటర్లలో, దుకాణాలలో విక్రయించే రకరకాల పాప్కార్న్లలో వెన్న, చక్కెర, ఉప్పు వంటి అధికంగా కలుపుతారని.. వీటిని తినడం వల్ల శరీరంలో అదనపు కేలరీలు పెరుగుతాయని.. తద్వారా బరువు పెరిగేందుకు దోహద పడుతుందని అంటున్నారు. 2018లో అమెరికన్ జర్నల్ ఆఫ్ క్లినికల్ న్యూట్రిషన్ లో ప్రచురితమైన అధ్యయనం ప్రకారం.. వెన్న, చక్కెర ఎక్కువగా ఉన్న పాప్ కార్న్ తినడం వల్ల బరువు పెరగుతారని కనుగొన్నారు. అలాగే చక్కెర దంతాలపై ప్లేక్ ఏర్పడటానికి దారితీస్తుందని.. ఇది చిగుళ్ల వ్యాధి, దంత క్షయానికి దారితీస్తుందని కనుగొన్నారు. ఈ పరిశోధనలో హార్వర్డ్ స్కూల్ ఆఫ్ పబ్లిక్ హెల్త్ లో పోషకాహార శాస్త్ర ప్రొఫెసర్ డాక్టర్ డా. మార్గరెట్ పెర్రీ పాల్గొన్నారు.
పాప్కార్న్లో ఉపయోగించే కృత్రిమ వెన్న రుచి ఊపిరితిత్తుల ఆరోగ్యాన్ని దెబ్బతీస్తుందని నిపుణులు అంటున్నారు. ఇలాంటి పాప్కార్న్ ఎక్కువ తింటే బ్రాంకియోలిటిస్ ఆబ్లిటెరాన్స్ అనే ఊపిరితిత్తుల సమస్య వచ్చే అవకాశం ఉందని ఓ అధ్యయనంలో తేలినట్లు వివరించారు. కొన్ని పాప్కార్న్స్లో చక్కెర వంటివి కలుపుతారు. వీటిని తినడం వల్ల రక్తంలోని చక్కెర స్థాయిలలో హెచ్చుతగ్గులకు దారితీస్తుందని అంటున్నారు. ఇది డయాబెటిక్స్ ప్రమాదాన్ని పెంచుతుందని హెచ్చరిస్తున్నారు. పాప్కార్న్ తింటుంటే ఒక్కోసారి దంతాల మధ్య చిక్కుకుపోతాయి. అయితే ఈ పరిస్థితి చిగుళ్ల వ్యాధి, దంత క్షయం వంటి దంత సమస్యలకు దారితీస్తుందని హెచ్చరిస్తున్నారు. పాప్కార్న్ పై తోలులో ఫైబర్ ఎక్కువగా ఉండటం వల్ల.. కొంతమంది ఉబ్బరం, గ్యాస్, అజీర్ణం వంటి సమస్యలతో ఇబ్బంది పడతారని అంటున్నారు.
