నేను 2005లో ఆటోమేటిక్ గేర్ల మారుతి జెన్ కొన్నాను. ఆ కారు ప్రతి 9 కిలోమీటర్లకు లీటరు పెట్రోలు గుటకేసేది. విలన్ హోండాలా. అప్పట్లో ఆటోమేటిక్ గేర్ల సాంకేతికత లభ్యత మన దేశంలో తక్కువ. దశాబ్దం క్రితం వరకు ఆటోమేటిక్ గేర్లున్న కార్ల మైలేజ్ మాన్యువల్ గేర్ల కార్లతో పోలిస్తే దాదాపు సగం వరకు తక్కువ ఉండేది. అలా ఎందుకో సాంకేతికత జోలికి పోకుండా అతిసరళంగా చెప్పే ప్రయత్నం చేస్తాను. బండి ముందుకు కదలాలంటే గేరు మార్చాలి. వేగం పెరిగే కొద్దీ పై గేరు వెయ్యటం వల్ల ఇంజను ఎక్కువ RPM వద్ద ఇంధనాన్ని సమర్థవంతంగా కాల్చి ఎక్కువ శక్తిని ఉత్పత్తి చేసి చక్రాలకు పంపగలదు. వేగం తగ్గే కొద్దీ కింది గేర్లకు మార్చి వ్యతిరేక ప్రక్రియలో తగ్గించిన శక్తిని చక్రాలకు పంపుతుంది. (ఒకే RPM వద్ద రెండవ గేరు కంటే మొదటి గేరులో ఎక్కువ ఇంధనం ఖర్చవుతుంది, తక్కువ టార్క్ ఉత్పన్నమవుతుంది.)
ఇక్కడ గేర్లు మార్చటం డ్రైవరు చేసే పని, అందుకు మానవ శక్తి ఖర్చవుతుంది. ఆటోమేటిక్ కార్లలో గేర్లు మార్చే పనిని డ్రైవర్ కాకుండా ఒక యంత్రం చేస్తుంది. గేర్లు మార్చేందుకు ఆ యంత్రానికీ శక్తి అవసరమే. అందుకే ఎక్కువ ఇంధనం ఖర్చవుతుంది. వివరాల్లోకి వెళ్తే, ఇంజను RPM పెరిగేకొద్దీ ఆటోమేటిక్ గేర్ బాక్సు తనంతట తానే గేరు మారుస్తుంది. RPM తగ్గేకొద్దీ కింది గేరు వేస్తుంది. ఈ ప్రక్రియలో గేరు మారే కుదుపు తెలియకుండా డ్యూయల్ క్లచ్ వాడే గేర్ బాక్సులు, ఇంకా ఎక్కువ క్లచ్ ప్లేట్లు ఉన్న అత్యాధునిక, అతిఖరీదైన కార్లూ ఉన్నాయి. నేడు ఆటోమేటిక్ సాంకేతికత ఎంతో మెరుగై ఆటోమేటిక్ కార్లు కూడా మాన్యువల్ గేర్ల కార్లతో సమానమైన మైలేజ్ ఇస్తున్నాయి.
AMT గేర్‌బాక్స్ మైలేజ్ కంటే TC, CVT గేర్‌బాక్సుల మైలేజ్ ఎక్కువగా ఉంటోంది. CVT, TC, DCT, DSG వంటివి నేడు ఆధునిక ఆటోమేటిక్ గేర్ల సాంకేతికతలు. ఆధునిక ఆటోమేటిక్ గేర్ బాక్సులు తదుపరి గేరును మరో క్లచ్ ప్లేటులో ముందే వేసి ఉంచి, గేరు మారిన కుదుపు తెలియకుండా చేస్తాయి. CVT, DSG లో ఇటువంటి సాంకేతికత వాడబడింది. CVT కనిపెట్టింది హోండా అయితే DSG ఫోక్స్ వాగెన్ వారిది. మాన్యువల్ కార్లలో మారుతి ఆల్టో లీటరు పెట్రోలుకు 24కిమీలు పరుగెత్తితే, డీజల్ బళ్ళలో హోండా అమేజ్ లీటరుకు 27కిమీలు పరుగెత్తుతోంది. (నా స్నేహితుడి మాన్యువల్ డీజల్ టాటా నెక్సాన్ 29 మైలేజ్ ఇస్తోంది.) అదే ఆటోమేటిక్ పెట్రోల్ కార్లలో రెనో క్విడ్ 24, డీజల్ కార్లలో మారుతి డిజైర్ 28 వరకు మైలేజ్ ఇస్తున్నాయి.ఆటోమేటిక్ కార్లు నడపటం తేలిక కావున ఎక్కువగా పట్టణపు ట్రాఫిక్‌లో నడిపేవారు ఇవే ఎంచుకుంటారు. వీటి నిర్వాహణ, సర్వీస్ ఖర్చులు మాన్యువల్ కంటే ఎక్కువగానే ఉంటాయి. వాడుకను బట్టి ఆటోమేటిక్ లేదా మాన్యువల్ గేర్ల కార్లు కొనుక్కోవటం మంచిది.
