అతిపిన్న వయసులోనే అసాధారణ గుర్తింపు పొంది స్టార్ హీరోయిన్ అనిపించుకున్న అలనాటి అందాల తార దివ్యభారతి గురించి ప్రత్యేకంగా పరిచయం అక్కర్లేదు. 19 ఏళ్ల వయసులోనే స్టార్ హీరోయిన్ గా ఎదిగి అభిమానులకి తీరని శోకాన్ని మిగిల్చింది ఈ అందాల తార. శ్రీదేవి బాలీవుడ్ కి వెళ్లిన తర్వాత తెలుగు తెరమీద మోస్ట్ గ్లామరస్ హీరోయిన్ అనిపించుకున్న తార దివ్యభారతి. సరిగ్గా మూడు దశాబ్దాల క్రితం జరిగిన ఈమె మరణం నేటికి మిస్టరీనే! 1974 ఫిబ్రవరి 25వ తేదీన మహారాష్ట్రలో జన్మించింది దివ్య భారతి. విక్టరీ వెంకటేష్ బొబ్బిలి రాజా చిత్రంతో తెలుగు తెరకు పరిచయమైంది ఈ ముద్దుగుమ్మ.
సీరియస్ పాత్రలలోనూ ఎక్స్పోజ్ చేయడంలో దివ్యభారతి పెట్టింది పేరు. అయితే 19 ఏళ్ల వయసులోనే ఆమె హఠాత్తుగా మరణించింది. ఈ మరణానికి ఒక సినిమాకు మధ్య లింకు ఉందా? అంటే ఉందనేవారు.. లేదనే వారు కూడా ఉన్నారు. అదే.. చింతామణి..! దివ్యభారతికి యూత్ లో ఉన్న ఫాలోయింగ్ గమనించిన దర్శకరత్న దాసరి నారాయణ రావు దివ్యభారతితో ఒక సినిమాను ప్లాన్ చేయాలని భావించారు. చింతామణి చాలా పాపులర్ నాటకం అన్న సంగతి తెలిసిందే. గతంలో రంగస్థలం మీద వేలాది ప్రదర్శనలు ఇచ్చిన నాటకం. చింతామణి పాత్ర గురించి విన్న దివ్యభారతి అందులో నటించాలని ముచ్చటపడింది.
1992లో ఈ మూవీ షూటింగ్ కూడా మొదలైంది. అయితే రెగ్యులర్ షూటింగ్ ప్రారంభం కావలసి ఉంది. ఈ నేపథ్యంలో డేట్ల సర్దుబాటు ప్రక్రియలో దివ్యభారతి మునిగిపోయింది. కానీ రెగ్యులర్ షూటింగ్ ఇంకా మొదలుకాకముందే దివ్యభారతి అకస్మాత్తుగా మరణించింది. దీంతో ఆ సినిమా అర్ధాంతరంగా ఆగిపోయింది.
ఆ తర్వాత ఈ సినిమాను మరొకరితో అయినా తీయాలని దాసరి పై ఒత్తిడి పెరిగింది. కానీ దానికి దాసరి ఒప్పుకోలేదు. దివ్యభారతి మనసు పెట్టుకున్న సినిమా అని, దీనిని తీయాలనుకుంటే ఆమెతోనే అని పక్కన పెట్టేశారు. నిర్మాత సాజిద్ నడియావాలాతో ప్రేమ, పెళ్లి.. ఆ వెంటనే మరణం.. అన్నీ కూడా తన కెరీర్ ఎంత స్పీడ్ గా పెరిగిపోయిందో అంతే స్పీడ్ గా కిందకు పడింది.
