మన చుట్టూ పరిసరాల్లోనే అనేక రకాల మొక్కలు ఉంటాయి. కానీ వాటిలో ఔషధ గుణాలు ఉంటాయనే విషయం చాలా మందికి తెలియదు. అలాంటి మొక్కల్లో గరిక కూడా ఒకటి. దీన్ని పశువులు ఇష్టంగా తింటాయి. కానీ మనం కూడా దీన్ని వాడవచ్చు. పలు అనారోగ్య సమస్యలను తగ్గించుకోవచ్చు. గరికతో ఏయే వ్యాధులను తగ్గించుకోవచ్చో ఇప్పుడు తెలుసుకుందాం.
1. గరిక గడ్డిని ముద్దగా నూరి నెయ్యి కలిపి మిశ్రమంగా తయారు చేసి దాన్ని చర్మంపై రాస్తుండాలి. దీంతో చర్మంపై ఏర్పడే పొక్కులు తగ్గుతాయి.
2. గరికను దంచి ముద్దగా నూరి దాన్ని రాస్తుంటే గాయాలు, పుండ్లు త్వరగా మానుతాయి.
3. గరిక గడ్డిని పసుపుతో కలిపి ముద్దగా నూరి ఆ మిశ్రమాన్ని రాస్తుంటే దద్దుర్లు, గజ్జి, తామర వంటి చర్మ వ్యాధులు తగ్గుతాయి.
4. గరిక వేళ్ల కషాయాన్ని 30 ఎంఎల్ మోతాదులో రోజూ తీసుకుంటుండాలి. మూత్రంలో మంట తగ్గుతుంది.
5. గరికవేళ్లను దంచి రెండు టీస్పూన్ల ముద్దను ఒక కప్పు పెరుగుకు కలిపి తీసుకోవాలి. మహిళల్లో వచ్చే వైట్ డిశ్చార్జి సమస్య తగ్గుతుంది.
6. మూత్రంలో రక్తం పడుతుంటే గరిక రసం ఒకటి లేదా రెండు టీస్పూన్లు లేదా గరిక వేళ్ల కషాయం 30 ఎంఎల్ మోతాదులో తీసుకుంటుండాలి.
7. గరికలను తీసుకుని నూరి ముద్దగా చేసి దాన్ని రాస్తుంటే అర్శమొలలు తగ్గుతాయి.
8. పిడికెడు గరికగడ్డి, 2 టీస్పూన్ల జీలకర్ర, ఒక టీస్పూన్ మిరియాలను రెండు గ్లాసుల నీటిలో వేసి చిన్న మంటపై మరిగించాలి. అరగ్లాస్ కషాయం మిగిలేంత వరకు మరిగించి దాన్ని ప్రతి రోజూ ఉదయం పరగడుపునే 4-5 రోజుల పాటు తీసుకోవాలి. దీంతో జ్వరం, ఫ్లూ తగ్గుతాయి.
9. గరికతో తయారు చేసిన కషాయాన్ని ఒక కప్పు మోతాదులో రెండు పూటలా తీసుకుంటుండాలి. మూత్రపిండాల్లో రాళ్లు కరిగిపోతాయి.
10. గరిక ఆకులను ఎండబెట్టి చూర్ణం చేసి నిల్వ చేసుకుని ఒక టీస్పూన్ మోతాదుగా అరకప్పు నీళ్లతో కలిపి తీసుకోవాలి. జీర్ణాశయంలో ఉండే అల్సర్లు తగ్గుతాయి.
11. రెండు లీటర్ల గరికగడ్డి రసాన్ని ఒక లీటర్ కొబ్బరినూనెలో వేసి నీరంతా ఆవిరయ్యేలా మరిగించి నిల్వ చేసుసుకుని తలనూనెగా వాడుకోవాలి. చుండ్రు తగ్గుతుంది.
12. గరికగడ్డి కషాయంతో పుక్కిట పడుతుంటే నోటిపూత తగ్గుతుంది.
