Toenail Fungus : పాదాలపై కొందరికి సహజంగానే ఫంగస్ లేదా బాక్టీరియా ఇన్ఫెక్షన్ల వల్ల పసుపు లేదా బూడిద రంగులోకి కాళ్ల వేళ్లు మారుతుంటాయి. ఈ సందర్భంలో కొందరికి నొప్పి, దురద, మంట ఉంటాయి. దీన్నే నెయిల్‌ ఫంగస్ లేదా ఆనికోమైకోసిస్‌ అంటారు. ఇది అత్యంత సహజసిద్ధంగా వచ్చే సమస్య. కొందరికి పాదాల్లో తేమ వల్ల బాక్టీరియా వృద్ధి చెంది ఇలా జరుగుతుంటుంది. అయితే ఈ సమస్యను సులభంగానే తగ్గించుకోవచ్చు. అందుకు కింద తెలిపిన చిట్కాలను పాటించాల్సి ఉంటుంది.
1. ఒక బకెట్‌లో సగం వరకు గోరు వెచ్చని నీళ్లను తీసుకోవాలి. అందులో రెండు టీస్పూన్ల యాపిల్‌ సైడర్‌ వెనిగర్‌ వేసి కలపాలి. అనంతరం ఆ నీటిలో పాదాలను ముంచి 30 నిమిషాల పాటు ఉంచాలి. తరువాత పాదాలను తీసేసి గోరు వెచ్చని నీటితో శుభ్రంగా కడిగి ఆరబెట్టాలి. ఇలా వారంలో మూడు సార్లు చేయాలి. దీంతో పాదాలపై ఉండే ఫంగస్ తగ్గిపోతుంది. పాదాలు మళ్లీ పూర్వ రూపాన్ని పొందుతాయి.
2. ఐదు వెల్లుల్లి రెబ్బలను తీసుకుని బాగా నలిపి నీటిలో వేసి మరిగించాలి. అనంతరం ఆ నీటిని బకెట్‌ వేడి నీటిలో కలపాలి. ఆ నీటిలో పాదాలను ముంచి 30 నిమిషాల పాటు ఉంచాలి. తరువాత పాదాలను తీసి కడిగేయాలి. ఇలా వారంలో మూడు సార్లు చేయాలి. వెల్లుల్లిలో సహజసిద్ధమైన యాంటీ బయోటిక్‌, యాంటీ ఫంగల్‌ గుణాలు ఉంటాయి. అందువల్ల పాదాలపై ఏర్పడే ఫంగస్, బాక్టీరియా పోతాయి.
3. రెండు వెల్లుల్లి రెబ్బలను తీసుకుని నలిపి అందులో కొద్దిగా ఆలివ్‌ ఆయిల్‌ వేసి కలపాలి. అనంతరం ఆ మిశ్రమాన్ని సమస్య ఉన్న వేలిపై రాయాలి. తరువాత గంట సేపు అలాగే ఉంచి అనంతరం గోరు వెచ్చని నీటితో కడిగేయాలి. ఇలా రోజూ చేయవచ్చు. దీంతో పాదాలపై ఉండే ఫంగస్, క్రిములు పోయి సమస్య తగ్గుతుంది.
4. మూడు టేబుల్‌ స్పూన్ల కొబ్బరినూనె, అంతే మోతాదులో పసుపు తీసుకుని కలిపి పేస్ట్‌లా చేయాలి. ఆ మిశ్రమాన్ని పాదాలపై సమస్య ఉన్న వేళ్లకు బాగా రాయాలి. గంట సేపు అయ్యాక గోరు వెచ్చని నీటితో కడిగేయాలి. పాదాలను పొడిగా అయ్యేలా ఆరబెట్టాలి. ఇలా రోజూ చేస్తే పాదాల ఫంగస్ తగ్గిపోతుంది.
5. పాదాలపై ఉండే ఫంగస్‌ను తగ్గించడంలో టీ ట్రీ ఆయిల్‌ కూడా బాగానే పనిచేస్తుంది. కొన్ని చుక్కల టీ ట్రీ ఆయిల్‌ ను నేరుగా వేళ్లపై అప్లై చేయవచ్చు. లేదా బకెట్‌ వేడి నీటిలో ఈ ఆయిల్‌ను కొన్ని చుక్కలు వేసి అనంతరం ఆ బకెట్‌లో పాదాలను ఉంచి 30 నిమిషాల తరువాత తీసి కడిగేయాలి. ఇలా వారంలో మూడు సార్లు చేస్తే ఫలితం ఉంటుంది.
6. పాదాల ఫంగస్‌ను తొలగించడంలో విక్స్‌ కూడా బాగానే పనిచేస్తుంది. రాత్రి పూట పాదాలకు సమస్య ఉన్న చోట కొద్దిగా విక్స్‌ రాయాలి. అనంతరం సాక్స్‌లను ధరించాలి. మరుసటి రోజు ఉదయం గోరు వెచ్చని నీటితో కడిగేయాలి. దీంతో మూడు, నాలుగు రోజుల్లోనే సమస్య నుంచి బయట పడవచ్చు.
7. బేకింగ్‌ సోడా, నిమ్మరసంలను కొద్దిగా తీసుకుని కలిపి సమస్య ఉన్న చోట రాసి గంట సేపయ్యాక గోరు వెచ్చని నీటితో కడిగేయాలి. ఇలా రోజూ చేస్తే ఫలితం ఉంంటుంది.
