పొగతాగటానికి అలవాటు పడ్డవారు తమకు తాము హాని చేసుకోవడమే కాకుండా పక్కవాళ్ల ఆరోగ్యానికి కూడా నష్టం కలిగిస్తారు. తాజా గణాంకాల మేరకు సిగరెట్లు తాగటం వలన ఊపిరితిత్తుల క్యాన్సర్లలో 90 శాతం,బ్రాంకైటిస్ కేసుల్లో 75 శాతం,గుండె జబ్బుల్లో 50 శాతంఈ అ లవాటు కారణంగానే సంక్రమిస్తున్నాయి. ప్రతి సంవత్సరం ప్రపంచ వ్యాప్తంగా దాదాపు 40 లక్షల మంది పొగాకు కారణంగా సంక్రమించిన వ్యాధుల వల్ల అకాల మృత్యువు వాత బడుతున్నారని అంచనా. ప్రపంచ వ్యాప్తంగా పొగతాగేవారు ఏడాదికి దాదాపు 6,000 బిలియన్ల సిగరెట్లను కాల్చేస్తున్నట్లు అధ్యయనం చెపుతోంది.
వ్యక్తిగతంగా పొగతాగే వారికి హాని కలిగించటమే కాకుండా, వాయు కాలుష్యం, వాతావరణ కాలుష్యం ఎంతగానో పెరుగుతుంది…. చిన్న పిల్లలు, పొగతాగని ఇతర వ్యక్తులు కూడా పేసివ్ స్మోకింగ్ కారణంగా ఎన్నో ఆరోగ్య సమస్యలను ఎదుర్కొనాల్సి వస్తోంది. అంతేకాక, పొగాకు ప్రాసెసింగ్కు పెద్ద ఎత్తున వంటచెరుకు కావాలి. అందువల్ల పొగాకు సాగు, ప్రాసెసింగ్ల కోసం ప్రతి సంవత్సరం పచ్చని అడవులు నరికివేతకు గురవుతూ పర్యావరణానికి సైతం ఎనలేని నష్టాన్ని సిగరెట్లు కలిగిస్తున్నాయి. పొగాకు పరిశ్రమ వల్ల ఉత్పత్తి దేశాల ఖజానాలకు భారీగానే ఆదాయం సమకూరుతోంది. కానీ అదే సమయంలో ఆ దేశాలు పొగాకు దుష్ప్రభావం కారణంగా సంక్రమించే వ్యాధుల చికిత్సకోసం, ప్రజా ఆరోగ్యం కోసం అనేక రెట్ల మొత్తంలో డబ్బును ఖర్చుచేయాల్సి వస్తోంది.
సిగరెట్ దుష్ ప్రభావాలపై సినిమాలు సైతం ప్రజలకు అవగాహన కలిగిస్తున్నాయి. ప్రభుత్వాలు సైతం పొగతాటం నిషేధించబడినదంటూ ప్రకటనలు చేస్తున్నాయి. పొగాకు చుట్టూ వున్న రాజకీయ, సామాజిక, ఆర్థిక, ఆరోగ్య, పర్యావరణ నష్టాల కారణంగా పొగాకుకు వ్యతిరేకంగా ఉద్యమించేందుకు, పొగాకు అ లవాటు (జబ్బు) నుంచి బయటపడేందుకు సత్వరమే ప్రతి ఒక్కరూ నడుం కట్టాలి.
