ప్రపంచ ఆరోగ్య సంస్థ (డబ్ల్యూహెచ్‌ఓ) అంచనాల ప్రకారం ప్రపంచంలో దాదాపు 422 మిలియన్ల మంది డయాబెటిస్ బారిన పడ్డారు. షుగర్ కారణంగా ప్రతి సంవత్సరం 1.5 మిలియన్ల మంది మరణిస్తున్నారు. ప్రపంచ వ్యాప్తంగా డయాబెటిక్ పేషెంట్స్‌ సంఖ్య వేగంగా పెరుగుతోంది. ప్రస్తుతం ప్రపంచ వ్యాప్తంగా పెద్దల్లో 41.5 కోట్ల మంది షుగర్ వ్యాధితో జీవిస్తున్నారు. 2040 నాటికి వీరి సంఖ్య 64.2 కోట్లకు చేరుకోవచ్చని అంచనా. అంటే 2040 నాటికి ప్రపంచ జనాభాలో ప్రతి 10 మందిలో ఒకరు డయాబెటిక్ పేషెంట్‌ ఉంటారన్నమాట. ప్యాంక్రియాస్ ఇన్సులిన్ అనే హార్మోన్‌ను తయారు చేయడం ఆపివేసినప్పుడు, తక్కువగా ఉత్పత్తి చేసినప్పుడు డయాబెటిస్ వస్తుంది. ఇన్సులిన్ తగినంత ఉత్పత్తి కాకపోయినా, సమర్థంగా పనిచేయకపోయినా రక్తంలో గ్లూకోజు స్థాయులు పెరిగిపోతాయి. మధుమేహానికి మూలం ఇదే. ఒకసారి డయాబెటిస్ వస్తే.. నియంత్రణలో ఉంచుకోవటం తప్పించి చేయగలిగిందేమీ లేదు.
డయాబెటిస్‌పై అవగాహన లేకపోవడంతో ఇది ప్రాణాంతకంగా మారే అవకాశం ఉంది. డయాబెటిస్ రాకముందే పసిగట్టడానికి వీలుందని నిపుణులు చెబుతున్నారు. శరీరంలో ఇన్సులిన్ తక్కువగా ఉన్నప్పుడు, అనేక మార్పులు కనిపిస్తాయి. షుగర్ వ్యాధి మీ చర్మంతో పాటు, శరీరంలోని అనేక భాగాలను ప్రభావితం చేస్తుంది. మీ చర్మంపై కొన్ని మార్పులు కనిపిస్తే.. మీకు డయాబెటిస్ లేదా ప్రీ- డయాబెటిస్ ఉందని అర్థం. ఇవి గమనించి మీ డాక్టర్‌ను సంప్రదించడం మంచిది. మీ శరీరంపై స్కిన్‌ ట్యాగ్స్‌ ఏర్పడతాయి. వీటినే అక్రోకార్డాన్‌లు అని అంటారు. అవి చర్మంపై ఉబ్బెత్తుగా, ప్రాణంలేని మాంసం ముక్కలా వేలాడదీసినట్లుగా కనిపిస్తాయి. ఇవి చర్మం రంగు లేదా ముదురు రంగులో ఉంటాయి. ఇవి సాధారణంగా మెడ చుట్టూ, రొమ్ము కింద, కనురెప్పల పైన, చంకల దగ్గర కనిపిస్తాయి. ఇవి డయాబెటిస్‌కు సైరన్‌ లాంటివని గుర్గావ్‌లోని ఆర్టెమిస్ హాస్పిటల్ చీఫ్ ఎండోక్రినాలజస్ట్ డాక్టర్ ధీరజ్ కపూర్ అన్నారు. ప్రాథమిక దశలో పరీక్ష చేయించుకోవడం మంచిదని సూచించారు.
బొబ్బలు అరుదుగా కనిపిస్తాయి. డయాబెటిస్, ప్రీ డయాబెటిస్ సమస్య ఉన్నవారి చర్మంపై అకస్మాత్తుగా బొబ్బలు కనిపిస్తాయి. మీరు పెద్ద పొక్కు, బొబ్బలను లేదా రెండింటినీ గమనించవచ్చు. చేతులు, పాదాలు, కాళ్లు, ముంజేతులపై బొబ్బలు ఏర్పడతాయి. ఇవి కాలిన బొబ్బల‌లా.. ఎక్కువగా నొప్పి ఉండవు. దీనిని డయాబెటిక్ బుల్లె అని కూడా అంటారు. అమెరికన్ అకాడమీ ఆఫ్ డెర్మటాలజీ అసోసియేషన్ ప్రకారం, చర్మంపై ఇన్సులిన్ లోపం కారణంగా ఎరుపు, పసుపు, గోధుమ రంగు మచ్చలు ఏర్పడతాయి. ఈ పరిస్థితిని నెక్రోబయోసిస్ లిపోయిడికా అని కూడా అంటారు. దీంతోపాటు దురద కూడా ఉంటుంది. ఈ లక్షణాలు కనిపిస్తే వైద్యుడిని సంప్రదించడం మేలు. చాలా కాలంగా శరీరంలో చక్కెర పరిమాణం పెరగడం వల్ల రక్తప్రసరణ సరిగ్గా జరగదు. ఇది శరీరంలోని అనేక కణాలను దెబ్బతీస్తుంది. మీరు చాలా కాలంగా డయాబెటిస్‌తో బాధపడుతుంటే.. మీ పుండ్లు త్వరాగా మానవు. ఈ పుండ్లను డయాబెటిక్ అల్సర్‌ అని కూడా అంటారు.
