Pregnancy Symptoms : తల్లి అవ్వాలని పెళ్లి అయిన ప్రతి స్త్రీ కోరుకుంటుంది. గర్భం దాల్చినప్పుడు కలిగే ఆ ఆనందమే వేరు. ఎంతో కాలంగా కంటున్న కలలు నిజమైన వేళ కలిగే ఆనందం అంతా ఇంతా కాదు. అయితే చాలా మంది స్త్రీలు గర్భం దాల్చిన తరువాత వారు తల్లి కాబోతున్నారని తెలుసుకోలేక పోతుంటారు. వారిలో కొన్ని లక్షణాలు కనిపించినప్పటికి వాటిని గుర్తించలేకపోతుంటారు. అయితే ఈ లక్షణాలు అందరిలో ఒకే విధంగా ఉండవు. శరీరతత్వాన్ని బట్టి ఒక్కొక్కరిలో ఒక్కోలా ఉంటాయి. కొందరిలో అసలు ఏ లక్షణాలు ఉండకపోవచ్చు కూడా. గర్భం దాల్చిన తరువాత అందరిలో మొదటగా కనిపించే లక్షణాలు ఏమిటో ఇప్పుడు తెలుసుకుందాం.
గర్భం దాల్చిన తరువాత నెలసరి రాదు. నెలసరి రావడం ఆలస్యమైన పది రోజుల తరువాత వైద్యుని సంప్రదించి పరీక్షలు చేయించుకోవాలి. అలాగే కొందరిలో వాంతులు, వికారం, తలనొప్పి, తల తిరిగినట్టుగా ఉంటుంది. అన్నం తినాలనిపించదు. కూరల వాసనను భరించలేకపోతారు. అదే విధంగా కొందరిలో కడుపునొప్పి వచ్చే అవకాశాలు కూడా ఉంటాయి. గర్భాశయంలో పిండం స్థిరపడేటప్పుడు ఈ విధంగా నొప్పి వస్తూ ఉంటుంది. అదే విధంగా కొందరిలో ఛాతి పరిమాణం పెరిగినట్టుగా ఉంటుంది. స్థనాలు గట్టిగా మారుతాయి. అలాగే స్థనాలు సున్నితంగా తయారవుతాయి. అయితే కొందరిలో నెలసరి వచ్చే ముందు కూడా ఈ లక్షణాలు కనిపిస్తాయి. వీటినే ప్రీ మెనుస్ట్రువల్ సిండ్రోమ్ అని అంటారు.
అయితే ఈ లక్షణాలు మూడు రోజుల కంటే ఎక్కువగా ఉంటే మాత్రం తప్పకుండా వైద్యున్ని సంప్రదించాలి. అలాగే గర్భం దాల్చిన రెండు వారాల నుండి ఎక్కువగా మూత్రానికి వెళ్లాల్సి వస్తుంది. సాధారణ సమయంలో పలుచగా వచ్చే వైట్ డిశ్చార్జ్ గర్భంతో ఉన్నప్పుడు మరింత ఎక్కువగా చిక్కగా వస్తుంది. ఈ లక్షణాలను బట్టి స్త్రీలు గర్భం దాల్చారో లేదా సులభంగా తెలుసుకోవచ్చని నిపుణులు చెబుతున్నారు.
