నా వయస్సు 20.. నాకు లైంగిక ఆలోచనలు ఎక్కువగా వస్తున్నాయి.. నేను కెరీర్ మీద concentrate చెయ్యలేక పోతున్నాను. దీనికి నేను ఏం చెయ్యాలి? ఒక వయసు వచ్చాక లైంగిక ఆలోచనలు ఉండటం సహజమే. అవి అదుపులో ఉండకపోతేనే ప్రమాదం. మారాలి అని అనుకుంటున్నారు. సంతోషం. ముందుగా.. ఒక చిన్న కథ చెబుతాను. ఒక పిల్లవాడికి సరిగ్గా చదువు మీద ధ్యాస కుదరకపోవడం అనేది గమనించిన తండ్రి మర్నాడు ఆ పిల్లవాడ్ని గుడికి తీసుకెళ్తాడు. దారిలో… ఆ పిల్లవాడు ఆ తినుబండారం కొనివ్వమని, ఈ ఆట వస్తువు కొనివ్వమని అడుగుతున్నా అతని తండ్రి పట్టించుకోడు. గుడికి వెళ్లి ఇద్దరూ దైవ దర్శనం చేసుకున్నాక, తన కొడుకు తల మీద ఒక పుస్తకాన్ని పెట్టి, దాని మీద ఒక స్కేలు, పెన్ను పెడతాడు. చెప్పులు లేకుండా, నెత్తిమీద నున్నవి కింద పడకుండా ఇంటి వరకూ వస్తే, ఎప్పట్నుంచో అడుగుతున్న సైకిల్ కొనిస్తానని చెబుతాడు. పిల్లవాడు సంతోషంగా సరేనంటాడు.
తిరిగి వచ్చేటప్పుడు నెత్తిన పుస్తకంతో వెళ్తున్న పిల్లవాన్ని చూసి అందరూ వింతగా చూస్తుంటారు. కొందరు బయటకి నవ్వుతూ వుంటారు. అయినా, పిల్లవాడి ధ్యాస మరలదు. ఆ తండ్రి బజారులో అంతకుముందు తన కొడుకు కొనివ్వమని అడిగిన తినుబండారాలను చూపించి, అవి తింటావా? అని అడుగుతాడు. అయితే, ఆ పిల్లవాడి ధ్యాస మొత్తం నెత్తిన వున్న బరువు మీదనే వుంటుంది. ఖరాఖండిగ వద్దు అనేస్తాడు. ఇంటికొచ్చాక, పిల్లవాడ్ని అభినందించి, ఇదివరకే తాను కొనిపెట్టి ఉంచిన సైకిల్ ని తీసుకొచ్చి, ఇలా అంటాడు. చూసావా చిన్నా… గుడికి వెళ్లేటప్పుడు ఎన్నో కావాలని అడిగావు. కానీ సైకిల్ అనే పెద్ద లక్ష్యం ముందు అవన్నీ చిన్నవిగా అయిపోయాయి. దారిలో ఎవరు ఎగతాళి చేసినా నువ్వు లక్ష్య పెట్టలేదు. అలాగే, జీవితంలో నీకు ఏది ముఖ్యం అని నువ్వు గుర్తించినప్పుడు, దారిలో వచ్చే చిన్నపాటి అవరోధాలు నిన్ను ఏమీ చెయ్యలేవు.. అన్నాడు.
మీకు ఎక్కువగా లైంగిక ఆలోచనలు వున్నాయని మీరు చెబుతున్నారు గనుక, మీరు వేరే ఏ పని లేకుండా… ఒంటరిగా, ఖాళీగా ఉండటం వలన, మీ ధ్యాసను మరి ఏ విషయం మీద కేంద్రకరించ లేకపోతున్నారు అని నేను అనుకుంటున్నాను. సోమరి అయినవాని బుర్ర దెయ్యాల కార్ఖానా అనీ సామెత చెబుతారు. కనుక, తక్షణమే మీ లక్ష్యానికి సంబంధించి కార్యాచరణను సిద్ధం చేసుకోండి. బుర్రను ఎప్పుడూ ఖాళీగా ఉంచకుండా ఏదో ఒక పనిని అప్పజెప్పుతూ వుండండి. ఇదివరకు చెయ్యకపోతే, యిప్పటి నుంచైనా శరీరాన్ని కూడా తగినంత కష్టపెట్టడం అలవాటు చేసుకోండి. వ్యాయామం, యోగా ఏదో ఒకటి ఆచరించండి. మెడిటేషన్ తో మనసుని నిమ్మళపర్చుకోండి. ముందుగా మీకు లైంగిక ఆలోచనలను తెచ్చే అంశాలను ఒక పేపర్ మీద రాసి పెట్టుకోండి. అవేమిటో తక్కినవాళ్ళ కన్నా మీకే బాగా తెలుస్తుంది. వాటన్నిటినీ తగ్గించే విధంగా మీ దినచర్యను ప్లాన్ చేసుకోండి.
పోటీ పరీక్షలకు ప్రిపేర్ అవ్వండి. వచ్చినా, రాకపోయినా, మీ చదువుకు తగినది అయినా, చిన్నదైనా సరే, ఇంటర్వ్యూలకు వెళ్ళడం అలవాటు చేసుకోండి. కేవలం జాబ్స్ కోసమే కాదు, మంచి internship ప్రోగ్రాంలను కూడా ప్రయత్నించండి. మీలో మౌఖిక పరీక్షలంటే ఏదైనా భయం, బెరుకు ఉన్నట్లయితే, అది కాస్తా పోతుంది. ఇంటర్వ్యూలలో మొదట్లో తెలియక చేసిన తప్పులు సరిదిద్దుకుంటూ, తర్వాత ఎదుర్కొనే ఇంటర్వ్యూల కోసం ప్రిపేర్ అవుతుంటే, రాన్రానూ చేసే తప్పులు కూడా తగ్గిపోతాయి. ఒక్కో మెట్టు ఎక్కుకుంటూ మీ కెరీర్ ని అత్యుత్తమ స్థాయిలో నిర్మించుకోవచ్చు! ఒకవేళ మీరు ఆల్రెడీ ఉద్యోగస్తులైతే… మీ కెరీర్ ని గాడిలో పెట్టేందుకు అవసరమైన కోర్సులను నేర్చుకోండి. నేర్చుకుని వదిలెయ్యకుండా ఆచరణలో పెట్టడానికి సదా ప్రయత్నించండి.
ఒంటరిగా ఉంటేనే మీకు లైంగిక పరమైన ఆలోచనలు వచ్చేందుకు ఎక్కువ ఆస్కారం వుంటుంది. కనుక… రోజులో, అనగా 24 గంటల్లో, నిద్ర పోయే ఆరు నుంచీ ఎనిమిది గంటల్లో తప్ప, తక్కిన సమయమంతా మీ కుటుంబ సభ్యుల సమక్షంలో, కెరీర్ పరంగా దోహదపడే వ్యక్తులతో, స్నేహితులతో గడపడానికి ప్రయత్నించండి.
