తెలుగు దేశం పార్టీ అధినేత, ఆంధ్ర ప్రదేశ్ రాష్ట్ర ముఖ్యమంత్రి చంద్రబాబు కోడలు, నందమూరి బాలయ్య కుమార్తె నారా బ్రాహ్మణి గురించి ప్రత్యేకంగా పరిచయం అక్కర్లేదు. అటు తాత, ఇటు మామ ముఖ్యమంత్రిగా పనిచేశారు. చేస్తున్నారు. తండ్రి ఎమ్మెల్యే, భర్త నారా లోకేష్ కూడా మంత్రిగా బాధ్యతలు నిర్వహిస్తున్నారు. అటు రాజకీయాలు, ఇటు సినీ నేపథ్యం ఉన్న బ్రాహ్మణి మాత్రం వ్యాపార రంగంలో తనకంటూ ఓ గుర్తింపు తెచ్చుకున్నారు. హెరిటేజ్ సంస్థ బాధ్యతల్ని చూస్తూ సక్సెస్ అయ్యారు.
బ్రాహ్మణి తెలుగులో అనర్గళంగా మాట్లాడగలరు. బ్రాహ్మణి స్టాన్ ఫోర్డ్ గ్రాడ్యుయేట్ స్కూల్ ఆఫ్ బిజినెస్ నుంచి ఎంబీఏ డిగ్రీ పూర్తి చేశారు. హెరిటేజ్ ఫుడ్స్ సంస్థకు ఎగ్జిక్యూటివ్ డైరెక్టర్ గా పని చేస్తున్న బ్రాహ్మణి ఈ సంస్థ అభివృద్ధి కోసం కీలక నిర్ణయాలు తీసుకుంటున్నారు.
నారా బ్రాహ్మణి సమాజ సేవ విషయంలో కూడా ముందు వరుసలో ఉంటారు. ఎన్టీఆర్ మెమోరియల్ ట్రస్ట్ ద్వారా వేర్వేరు అంశాలపై దృష్టి పెట్టిన బ్రాహ్మణి సమాజంలో మార్పు తీసుకొని రావడానికి తన వంతు ప్రయత్నాలు చేస్తుండటం గమనార్హం. బ్రాహ్మణి మంచి వక్త కాగా ఈ విషయం ఆమె అభిమానులలో చాలామందికి తెలియదు. యంగ్ ప్రెసిడెంట్ ఆర్గనైజేషన్ హైదరాబాద్ చాప్టర్ లో ఆమె సభ్యురాలు కావడం గమనార్హం. బ్రాహ్మణి ప్రయాణాలను ఎంతగానో ఇష్టపడతారు. ఔత్సాహిక మహిళ వ్యాపారవేత్తలలో నారా బ్రాహ్మణి స్ఫూర్తిని నింపుతున్నారు. నారా బ్రాహ్మణి ప్రతిభను చూసి నందమూరి బాలకృష్ణ అభిమానులు సైతం ఒకింత ఆశ్చర్యానికి గురవుతున్నారు.
