ఆయుర్వేదంలో అనేక రకాల మూలికలను ఉపయోగించినట్లే వస ను కూడా ఉపయోగిస్తారు. ఎన్నో వందల ఏళ్ల నుంచే వస ను ఆయుర్వేదంలో వాడుతున్నారు. హిమాలయాల్లో వసకు చెందిన ప్రత్యేకమైన రకం దొరుకుతుంది. వస వల్ల మనకు ఎలాంటి ప్రయోజనాలు కలుగుతాయో ఇప్పుడు తెలుసుకుందాం.
1. నాడీ మండల వ్యవస్థ పనితీరును మెరుగు పరచడంలో వస ఎంతగానో ఉపయోగపడుతుంది. ఆందోళన, ఒత్తిడి, జ్ఞాపకశక్తి తగ్గిపోవడం, కిడ్నీస్టోన్లు వంటి సమస్యలకు వస పనిచేస్తుంది.
2. ఆకలి బాగా తగ్గిన వారు, అజీర్ణం, మలబద్దకం వంటి సమస్యలు ఉన్నవారు వస చూర్ణం తీసుకుంటే ఫలితం ఉంటుంది. ఇది జీర్ణాశయంలో అగ్నిని పెంచుతుంది. దీంతో జీర్ణశక్తి పెరుగుతుంది.
3. జీర్ణాశయంలో అల్సర్లకు, గ్యాస్‌, అసిడిటీ సమస్యలకు వస పనిచేస్తుంది. విరేచనాలు, చర్మ సమస్యలు ఉన్నవారు వసను తీసుకోవాలి.
4. వస కొమ్ములు, తుంగముస్తల గడ్డలు, పసుపు, శొంఠి కొమ్ములు కచ్చాపచ్చాగా దంచి నీళ్లకు కలిపి మరిగించి కషాయం కాచి తీసుకోవాలి. దీంతో విరేచనాలు తగ్గుతాయి.
5. వసకొమ్ము పొడిని తేనెతో కలిపి తీసుకుంటే మూర్ఛ తగ్గుతుంది. వసకొమ్ముల పొడిని ఆవనూనెతో కలిపి రాస్తుంటే శరీర భాగాల‌పై ఏర్ప‌డే వాపులు, నొప్పులు తగ్గుతాయి.
6. వస చూర్ణాన్ని తేనె, బెల్లంతో కలిపి తీసుకుంటే అసిడిటీ తగ్గుతుంది. వసకొమ్ము, దేవదారు వేరు పట్ట లేదా గురవింద గింజలను ముద్దగా నూరి జుట్టు ఊడినచోట లేపనం చేస్తే జుట్టు పెరుగుతుంది.
7. వస కొమ్ము వేసి కాచిన నీళ్లతో గాయాలు, పుండ్ల‌ను కడిగి శుభ్రం చేయాలి. దీంతో అవి త్వ‌ర‌గా మానుతాయి.
8. వసకొమ్ములను పాలలోవేసి మరిగించి కనీసం ఒక నెలపాటు తీసుకుంటే మంచి జ్ఞాపకశక్తి వ‌స్తుంది. కంఠ స్వ‌రం చ‌క్క‌గా మారుతుంది.
9. వసకొమ్ములను, సోంపు గింజలను కలిపి నూరి ముద్దగాచేసి అర్శమొలల మీద ప్రయోగించాలి. దీనికి ముందు నువ్వుల నూనెను వేడిచేసి బాహ్యంగా ప్రయోగిస్తే ఉపశమం లభిస్తుంది.
వస చూర్ణం అయితే రోజుకు 1-2 చిటికెలు తీసుకోవచ్చు. భోజనం అనంతరం తేనెతో కలిపి తీసుకుంటే జీర్ణ సమస్యలు తగ్గుతాయి. వస క్యాప్సూల్స్‌ రూపంలోనూ లభిస్తుంది. రోజుకు రెండు సార్లు 1-2 క్యాప్సూల్స్‌ను తీసుకోవచ్చు. జీర్ణ సమస్యలు, అల్సర్లు, కిడ్నీ స్టోన్లు తగ్గుతాయి. వసలో యాంటీ ఇన్‌ఫ్లామేటరీ, యాంటీ బాక్టీరియల్‌, యాంటీ ఆక్సిడెంట్ గుణాలు ఉంటాయి. అందువల్ల చర్మ సమస్యలకు పనిచేస్తుంది. ఒక టీస్పూన్‌ వస చూర్ణం తీసుకుని నీళ్లు కలిపి పేస్ట్‌లా చేసి చర్మంపై సమస్య ఉన్న చోట రాస్తే ఉపశమనం లభిస్తుంది.
ఒక టీస్పూన్‌ వస చూర్ణం, అంతే మోతాదులో త్రిఫల చూర్ణం తీసుకుని అందులో కొద్దిగా నీళ్లు కలిపి పేస్ట్‌లా చేయాలి. దాన్ని పొట్ట మీద, తొడలపై కొవ్వు ఉన్న చోట రాయాలి. ఇలా చేస్తుంటే కొవ్వు కరుగుతుంది. వస మనకు ఎసెన్షియల్‌ ఆయిల్‌ రూపంలోనూ లభిస్తుంది. దీన్ని కూడా వాడవచ్చు. వస నూనెలో కొద్దిగా నువ్వుల నూనె కలిపి రాస్తుంటే కీళ్ల నొప్పులు, వాపులు తగ్గుతాయి.
