గుండు పిన్ను నుండి ఎయిర్ ప్లేన్ వరకు ఎన్నో బిజినెస్‌లు చేసి దిగ్గ‌జ వ్యాపార వేత్త‌గా ఎదిగారు రతన్ టాటా. వేలకోట్ల వ్యాపార సామ్రాజ్యానికి అధినేత అయినప్పటికీ ఆయన సామాన్యులకు ఏనాడు దూరం కాలేదు… కానీ ఆ దేవుడే ఆయనను దూరం చేసాడు. రతన్ టాటాకి పెళ్లి కాలేదు… కాబట్టి పిల్లాపాపలు లేరు. ఈ క్రమంలోనే తన జంతుప్రేమ, మానవత్వంతో ఓ యువకుడు ఎంతగానో ఆకట్టుకున్నాడు. దీంతో వృద్దాప్యంలో అత‌న‌ని తన సహాయకుడిగా నియమించుకున్నారు రతన్ టాటా. మరి ఆ వ్య‌క్తి మ‌రెవ‌రో కాదు శంతను నాయుడు. ఇత‌ను మన తెలుగు వాడే. 86 ఏళ్ల రతన్ టాటా, 31 ఏళ్ల శంతను నాయుడు ఎలా ఫ్రెండ్స్ అయ్యారు. వారి మధ్య సంబంధం ఎలా ఉండేది అనేది ప్రస్తుతం ఆసక్తికరంగా మారింది.
రతన్ టాటా మరణంపై శాంతను నాయుడు సోషల్ మీడియాలో ఎమోషనల్ పోస్టు చేశారు. మీ నిష్క్రమణతో మన స్నేహంలో శూన్యం మిగిలింది.. ఆ లోటును అధిగమించడానికి ఈ జీవితాంతం ప్రయత్నిస్తాను. ఈ ప్రేమ దూరమవడంతో కలుగుతోన్న దు:ఖం పూడ్చలేనిది. ‘గుడ్ బై మై డియర్ లైట్ హౌస్’ అని ఆవేదనతో పోస్టు చేశారు. మహారాష్ట్రలోని పూణే నగరంలో నివాసముండే తెలుగు కుటుంబంలో 1993 లో శంతను నాయుడు జన్మించాడు. అతడి తండ్రి టాటా మోటార్స్ లో పనిచేసాడు. విద్యాభ్యాసమంతా స్వస్థలంలోనే పూర్తిచేసాడు. పూణేలోని సావిత్రబాయి పూలే విశ్వవిద్యాలయంలో ఇంజనీరింగ్ పూర్తి చేసాడు. కార్నెల్ జాన్సన్ గ్రాడ్యుయేట్ స్కూల్ ఆఫ్ మేనేజ్ మెంట్ నుండి ఎంబిఏ పూర్తిచేసాడు. ఆ తర్వాత టాటా సంస్థలో ఉద్యోగంలో చేరాడు. టాటా ఎల్క్సీ లో ఆటోమొబైల్ డిజైన్ ఇంజనీర్ గా పనిచేసాడు శంతను.
శంతను నాయుడు సంస్థ మోటోపాజ్ రోడ్డుపై తిరిగే కుక్కల కోసం ప్రత్యేక డెనిమ్ కాలర్‌లను తయారు చేసింది. వాటిపై రిఫ్లెక్టర్లు ఉన్నాయి. రోడ్లపై వేగంగా వెళ్లే వాహనాల నుంచి కుక్కలను రక్షించవచ్చు. ఇదే శంతను నాయుడుపై రతన్ టాటా దృష్టి పడేలా చేసింది. దీంతో శంతను నాయుడిని ముంబైకి పిలిచిన రతన్ టాటా.. అప్పటి నుంచి వారిద్దరి స్నేహం ప్రారంభమైంది. స్నేహానికి వయసుతో సంబంధం లేదు… మంచి మనసుంటే చాలని రతన్ టాటా, శంతను నాయుడు నిరూపించారు. కాలేజీ కుర్రాళ్లలా ఈ ఇద్దరూ ఎక్కడికి వెళ్లినా కలిసి వుండేవారు. ఇలా శంతనుతో స్నేహం బాగా నచ్చడంతో 2018 లో మేనేజర్ గా నియమించుకున్నారు రతన్ టాటా. అప్పటినుండి వ్యక్తిగత సహాయకుడిగా, ఓ స్నేహితుడిగా రతన్ టాటా వెన్నంటివుండి సహాయం చేసేవాడు శంతను. ఒకరు వయసు మీదపడిన వ్యాపారదిగ్గజం కాగా మరొకరు నూనుగు మీసాల నవ యువకుడు. వీరి స్నేహం ఎంత బలంగా వుండేదో తెలియజేసే ఫోటోలు సోషల్ మీడియాలో చక్కర్లు కొడుతున్నాయి.
