నిత్యం మ‌నం ఏం ప‌ని చేసినా చేయ‌క‌పోయినా ఆహారాన్ని మాత్రం తినాల్సిందే. అందుకు వంట ఇంట్లో అంద‌రూ కుస్తీ ప‌డుతుంటారు. ఎవ‌రికి న‌చ్చిన‌ట్లు వారు ఆహారాల‌ను త‌యారు చేసి తింటుంటారు. అయితే ప‌లు ర‌కాల వంట ఇంటి చిట్కాల‌ను పాటిస్తే వంట వండ‌డం తేలిక‌వుతుంది. అంతేకాదు రుచిక‌ర‌మైన ఆహారాల‌ను కూడా తిన‌వ‌చ్చు. ఇక అంద‌రికీ ఉప‌యోగ‌ప‌డే ప‌లు వంట ఇంటి చిట్కాలు ఏమిటో ఇప్పుడు తెలుసుకుందాం.
చల్లబడిన చపాతీలపై కొద్దిగా నీళ్లు చల్లి మళ్లీ వేడిచేస్తే మెత్తగా మారుతాయి. కుక్కర్‌ అడుగున పేరుకుపోయినట్లు ఉంటే వంట చేసేముందు ఒక నిమ్మచెక్క కుక్కర్‌లో వేసి ఉడికిస్తే సరి. ఇడ్లీ పాత్రలు నల్లబడితే డిటర్జెంట్‌ పౌడర్‌, వెనిగర్‌ కలిపి వాడేసిన టూత్‌బ్రష్‌తో తోమితే ఇడ్లీ పాత్రలు మెరుస్తాయి. పాలను కాచేముందు పాలల్లో కొద్దిగా ఇలాయిచి పొడి వేసి కాస్తే పాలు విరగవు.
గారెలు మృదువుగా రావడానికి మినపప్పులో చారెడు పచ్చ పెసలు కలిపి రుబ్బితే గారెలు మృదువుగా వస్తాయి. ఏదైనా కూరలో లేదా చట్నీలో కారం ఎక్కువైతే కాస్తంత నిమ్మ రసం పిండితే సరి. పరుపులు, సోఫా స్పాంజీల కింద వేపఆకులు, తులసి ఆకులు పెట్టి ఉంచితే అక్క‌డ క్రిమికీటకాలు, బ్యాక్టీరియా చేర‌వు. చెవిలో చీమ, లేదా పురుగు చొరబడితే త్వరగా బయటకు రావాలంటే టార్చిలైటు ఆన్‌ చేసి చెవిలోపలివైపు చూపాలి. క్షణాల్లోనే బయటికివస్తాయి. పటికబెల్లం ముక్కతో పులిపిర్ల మీద, మొటిమల మీద రుద్దితే ఫలితం కనిపిస్తుంది.
