వీలయినంత వరకు మీ టికెట్ ముందుగానే బుక్ చేస్కోండి. ఆలస్య, అనిశ్చిత వీరులకు రైల్వే వారు తత్కాల్, ఏ సీ, సువిధ, డైనమిక్ ఫేర్, వేటింగ్ లిస్ట్ కాన్సిలేషన్, ఆందోళన మొదలైన అనేక బహుమతి వడ్డనలు ఎపుడూ సిధ్ధంగా వుంచుతారు. ఎక్కడయితే ప్రజా ప్రవాహం ఉంటుందో అక్కడ మోసాలు తీవ్రంగా, ఆశ్చర్యకరంగా, సృజనాత్మకంగా ఉంటాయి. ఎంత తక్కువ లగేజి వుంటే అంత సౌకర్యంగా వుంటుంది. అలాగని అవసరం అయినవి వదిలేయ‌కూడదు, ఇబ్బంది పడతాం. వీలైనంత వరకు ఒంటరిగా కాక, కనీసం ఇద్దరు లేక బృంద ప్రయాణం మేలు. వీలైనంత వరకు ఒక్క రూపాయి కూడా బయటకు తీసి ఏమీ కొనాల్సిన అవసరం రాకుండా చూస్కోండి. చాలా వరకు అధిక ధరలు, నాసి రకం క్వాలిటీ, మోసాలే.
ప్రయాణం నాలుగు గంటల లోపయితే, మంచినీళ్ళు, 4-6 లోపయితే కాసిని స్నాక్స్, ఒక రోజు లోపయితే భోజనం ఏర్పాట్లు ఇంటి నుంచే చేస్కుని వెళ్ళడం అత్యుత్తమం. అంతకు మించయితే ఇక తప్పదేమో- అపుడు ప్లాట్ఫారం ల మీద కాకుండా పాంట్రీ కార్ లో నే కొనండి- ఏదయినా సమస్య అయితే కంప్లయింట్ చేయడం తేలిక. పిల్లలతో ప్రయాణిస్తుంటే చాలా సూచనలు మారిపోతాయి. వారి ప్రపంచం కొంత తరలించాల్సి రావచ్చు. ఎనిమిది నుంచి 14 గంటల ప్రయాణం అయితే, రాత్రి ట్రయిన్ ఎంచుకోవడం మంచిది- ఎక్కువ అవసరాలు లేకుండా నిద్ర లో ప్రయాణం గడిచిపోతుంది. మీరు మందులు ఏమన్నా వాడుతుంటే అవి సరిపడా తప్పకుండా ముందే సర్ది ఉంచుకోండి. 6 గం కు మించి ప్రయాణం అయితే ఒక వార్త పత్రిక, ఒక దుప్పటి ఉంచుకోండి.
ఇక పూర్తి చార్జింగ్ లో ఉన్న ఫోను, పవర్ బాంక్, తగినంత డబ్బు, ఐ డి కార్డు తప్పనిసరి. దారిలో చదువుకోడానికి ఒక మంచి పుస్తకం ఉంటే అపరిచితులతో మాట కలిపి చిక్కుల్లో పడే బాధ తప్పుతుంది. ఈ రోజుల్లో ఎవరినీ నమ్మలేము మరి. ప్రస్తుత పరిస్థితి లో మాస్క్, సానిటైజెర్ తప్పనిసరి. ఎవరు ఎంత మంచిగ తినడానికి లేక త్రాగటానికి ఏమిచ్చినా తీస్కోకండి. మొహమాటం అసలు వద్దు. మరీ బలవంతం చేస్తే, బాగ్ లో పెట్టుకుని, ఇంటికెళ్ళి తింటాననొ, లేక ఈ రోజు మీరు ఉపవాసమనో చెప్పేయండి. వేర్ ఇస్ మై ట్రయిన్ అనే ఆప్ డౌన్లోడ్ చేస్కోండి. ఇది ప్రయాణం ముందు నుంచి, పూర్తయేవరకు, మీ ట్రయిన్ ఎక్కడ వుంది అనేది, అది వెళ్ళే దారి, దాటిన, రాబోయే స్టేషన్లు, సరి సమయమా, లేటా మొదలగు అనేక విషయాలు తెలియజేస్తుంటుంది.
దక్షిణ భారతం అయితే తమిళం, ఉత్తర భారతమయితే హిందీ భాషలు తెలిసి ఉంటే మంచి సౌకర్యం గా ఉంటుంది. మీ ట్రయిన్ ప్రయాణంలో భద్రత లేక అత్యవసర వైద్య సహాయ విషయమై ఎటువంటి సమస్య లేక అనుమానం ఎదురయినా, 139 కు కాల్ చెయండి. చేసినాక IVRS లో 1 నొక్కండి. ట్విట్టర్ లోనూ రైల్వే వారికి సంప్రదించవచ్చు. కాని ఏమి చెప్పాలన్నా, మీ వివరాలు ఫలానా బోగీ, నంబర్ వగయిరా చెప్పకుండా, PNR నంబర్ చెప్పండి. వారికదే ప్రామాణికం. ఆ నంబర్ అందుబాటులో ఉంచుకోండి. మీరెన్ని చెప్పినా, వారు PNR నంబర్ ఎంత అనే అడుగుతారు. అదొక్కటి చాలు.
