Aloo Goru Chikkudu Iguru : మ‌నం ఆహారంగా తీసుకునే కూర‌గాయ‌ల్లో గోరు చిక్కుడు కాయ‌లు కూడా ఒక‌టి. ఇత‌ర కూర‌గాయ‌ల వ‌లె గోరు చిక్కుడు కాయ‌లు కూడా మ‌న ఆరోగ్యానికి ఎంతో మేలు చేస్తాయి. వీటిని ఆహారంగా తీసుకోవ‌డం వ‌ల్ల మ‌నం అనేక ర‌కాల ఆరోగ్య ప్ర‌యోజ‌నాల‌ను పొంద‌వ‌చ్చు. ఈ గోరు చిక్క‌డు కాయ‌ల‌తో బంగాళాదుంప‌ల‌ను క‌లిపి ఎంతో రుచిగా ఇగురును త‌యారు చేసుకోవ‌చ్చు. ఆలూ గోరుచిక్క‌డు కాయ ఇగురు చాలా రుచిగా ఉంటుంది. ఇంట్లో అంద‌రూ ఈ కూర‌ను విడిచి పెట్ట‌కుండా తింటారు. రుచితో పాటు ఆరోగ్యానికి మేలు చేసే ఆలూ గోరు చిక్క‌డుకాయ ఇగురును ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాల ఏమిటి.. అన్న వివ‌రాల‌ను ఇప్పుడు తెలుసుకుందాం.
ఆలూ గోరు చిక్కుడుకాయ ఇగురు త‌యారీకి కావ‌ల్సిన ప‌దార్థాలు..
త‌రిగిన గోరు చిక్కుడు కాయ‌లు – పావు కిలో, త‌రిగిన బంగాళాదుంప‌లు – 2, నూనె – 2 టేబుల్ స్పూన్స్, తాళింపు దినుసులు – ఒక టీ స్పూన్, ఎండుమిర్చి – 1, క‌రివేపాకు – ఒక రెమ్మ, పొడుగ్గా త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, ఉప్పు – త‌గినంత, త‌రిగిన టమాటాలు – 2, ప‌సుపు – అర టీ స్పూన్, కారం – ఒక టేబుల్ స్పూన్, గ‌రం మ‌సాలా – అర టీ స్పూన్, త‌రిగిన కొత్తిమీర – కొద్దిగా.
ఆలూ గోరు చిక్కుడు కాయ ఇగురు త‌యారీ విధానం..
ముందుగా ఒక క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, ఎండుమిర్చి, క‌రివేపాకు వేసి వేయించాలి. తరువాత ఉల్లిపాయ ముక్క‌లు, ప‌చ్చిమిర్చి వేసి వేయించాలి. ఉల్లిపాయ ముక్క‌లు వేగిన తరువాత గోరు చిక్కుడు ముక్క‌లు, ఉప్పు వేసి క‌ల‌పాలి. వీటిపై మూత పెట్టి ముక్క‌ల‌ను మ‌గ్గించాలి. గోరు చిక్కుడు ముక్క‌లు స‌గంకు పైగా మ‌గ్గిన తరువాత బంగాళాదుంప ముక్క‌ల‌ను వేసి క‌ల‌పాలి. తరువాత వీటిపై మూత పెట్టి బంగాళాదుంప ముక్క‌ల‌ను పూర్తిగా మ‌గ్గించాలి. తరువాత ట‌మాట ముక్క‌లు, అర టీ గ్లాస్ నీళ్లు పోసి ట‌మాట ముక్క‌ల‌ను మెత్త‌గా మ‌గ్గించాలి.
ట‌మాట ముక్క‌లు చ‌క్క‌గా మ‌గ్గిన తరువాత ప‌సుపు, కారం, గ‌రం మ‌సాలా వేసి క‌ల‌పాలి. వీటిని రెండు నిమిషాల పాటు క‌లుపుతూ వేయించిన తరువాత కొత్తిమీర చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆలూ గోరు చిక్కుడు ఇగురు త‌యార‌వుతుంది. దీనిని అన్నం, చ‌పాతీ, రోటీ, పుల్కా వంటి వాటితో క‌లిపి తింటే చాలా రుచిగా ఉంటుంది. గోరు చిక్క‌డు కాయ‌ల‌ను ఇష్ట‌ప‌డ‌ని వారు కూడా ఈ విధంగా చేసిన కూర‌ను ఎంతో ఇష్టంగా తింటారు.
