Aloo Vankaya Vepudu : అన్నం లేదా చ‌పాతీలు.. ఎందులోకి అయినా స‌రే ఆలూ వంకాయ వేపుడు రుచిగా ఉంటుంది..

Aloo Vankaya Vepudu : మ‌నం వంకాయ‌ల‌తో ర‌క‌ర‌కాల వంట‌కాల‌ను త‌యారు చేసుకుని తింటూ ఉంటాం. అలాగే బంగాళాదుంప‌ల‌తో కూడా ఎంతో రుచిగా ఉండే వంట‌కాల‌ను త‌యారు చేస్తూ ఉంటాం. విడివిడిగా కాకుండా ఇవి రెండు క‌లిపి కూడా మ‌నం వంట‌ల‌ను త‌యారు చేసుకోవ‌చ్చు. ఇవి రెండు కూడా మ‌న ఆరోగ్యానికి మేలు చేసేవే. వంకాయ‌, బంగాళాదుంప‌ల‌ను క‌లిపి చేసే వేపుడు చాలా రుచిగా ఉంటుంది. ఒక్క ముద్ద కూడా వ‌దిలి పెట్ట‌కుండా ఇంట్లో అంద‌రూ ఈ కూర‌తో భోజ‌నం చేస్తారు. రుచిగా, సులువుగా ఆలూ వంకాయ వేపుడును ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.

ఆలూ వంకాయ వేపుడు త‌యారీకి కావ‌ల్సిన ప‌దార్థాలు..

వంకాయ‌లు – అర‌కిలో, ఉడికించిన బంగాళాదుంప‌లు – పావు కిలో, ఎండుమిర్చి – 10, వెల్లుల్లి రెబ్బ‌లు -4,నువ్వులు – ఒక టేబుల్ స్పూన్, వేయించి పొట్టు తీసిన ప‌ల్లీలు – 2 టేముల్ స్పూన్స్, ల‌వంగాలు – 4, దాల్చిన చెక్క – ఒక ఇంచు ముక్క‌, నూనె – 2 టేబుల్ స్పూన్స్, తాళింపు దినుసులు – ఒక టేబుల్ స్పూన్, క‌చ్చా ప‌చ్చ‌గా దంచిన వెల్లుల్లి రెబ్బ‌లు – 3, స‌న్న‌గా పొడుగ్గా త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, క‌రివేపాకు – ఒక రెమ్మ‌, ఉప్పు – త‌గినంత‌, ప‌సుపు – అర టీ స్పూన్, ధ‌నియాల పొడి – ఒక టీ స్పూన్, గ‌రం మ‌సాలా – ఒక టీ స్పూన్, త‌రిగిన కొత్తిమీర – కొద్దిగా.

ఆలూ వంకాయ వేపుడు త‌యారీ విధానం..

ముందుగా వంకాయ‌ల‌ను చిన్న ముక్క‌లుగా క‌ట్ చేసి ఉప్పు నీటిలో వేసుకోవాలి. బంగాళాదుంప‌ల‌పై పొట్టును తీసి ముక్క‌లుగా చేసుకుని ప‌క్క‌కు పెట్టుకోవాలి. త‌రువాత ఒక జార్ లో ఎండుమిర్చి, నువ్వులు, ల‌వంగాలు, దాల్చిన చెక్క‌, వెల్లుల్లి రెబ్బ‌లు, ప‌ల్లీలు వేసి మ‌రీ మెత్త‌గా కాకుండా మిక్సీ ప‌ట్టుకోవాలి. ఇప్పుడు ఒక క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు వేసి వేయించాలి. త‌రువాత ఉల్లిపాయ‌, ప‌చ్చిమిర్చి, క‌రివేపాకు, దంచిన వెల్లుల్లి రెబ్బ‌లు వేసి వేయించాలి. ఇవి వేగిన త‌రువాత వంకాయ ముక్క‌లు, ఉప్పు వేసి క‌లుపుకోవాలి. వీటిపై మూత పెట్టి మ‌ధ్య మ‌ధ్య‌లో క‌లుపుతూ వంకాయ ముక్క‌ల‌ను పూర్తిగా వేయించుకోవాలి.

వంకాయ ముక్క‌లు వేగిన త‌రువాత బంగాదుంప ముక్క‌లు వేసి 2 నిమిషాల పాటు క‌లుపుతూ వేయించాలి. త‌రువాత ప‌సుపు, ధ‌నియాల పొడి, గ‌రం మ‌సాలా, ముందుగా మిక్సీ ప‌ట్టుకున్న పొడి వేసి క‌లుపుకోవాలి. దీనిని మ‌రో 3 నిమిషాల పాటు వేయించి కొత్తిమీర‌ను చ‌ల్లుకుని స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఆలూ వంకాయ వేపుడు త‌యార‌వుతుంది. దీనిని అన్నం, చ‌పాతీతో క‌లిపి తింటే చాలా రుచిగా ఉంటుంది. ఈ వేపుడును అంద‌రూ ఇష్టంగా తింటారు.