ఒక ఇంటి అరుగు మీద కూర్చుని రేగుపళ్ళు తింటున్నాడో పదేళ్ళ పిల్లాడు. ఒకో పండూ తిని గింజను మట్టిలోకి ఊస్తున్నాడు. వాటిలో ఒక గింజ తోటిగింజలతో ఆశగా ఇలా అంది. ఇప్పుడు మనం ఆ మట్టిలో పడి మొలకెత్తుతాం కదూ. ఇంత చిన్నగా ఉన్న మనం మొలకై, మొక్కై, మానై మన అమ్మంత పెద్దవుతాం. నీడను, పళ్ళను ఇచ్చేంత గొప్పస్థాయికి వెళ్తాం. తలుచుకుంటేనే ఎంతో ఉత్సాహంగా ఉంది.. అంటూ మురిసిపోయింది. ఇంకో గింజ అంత ఆశ పడకు. అరుగు ముందు నేల చూశావా? గడ్డి పరక కూడా లేకుండా ఎలా ఉందో! ఈ ఇంటి ఇల్లాలు ఇక్కడంతా శుభ్రం చేసేసి ముగ్గు వేస్తుందనుకుంటా. మనం పొరపాటున మట్టిలో మిగిలి మొలకెత్తినా అంతే. పీకి పారేస్తుంది. ఎదగనిచ్చి ఇంటికి అడ్డంగా మహావృక్షంగా మారనిస్తుందా ఏమిటి? అంది.
కింద పరిశీలించిన మిగతా గింజలు అవునంటూ ఒప్పుకున్నాయి నిరుత్సాహంగా. కానీ మొదటి గింజ పట్టుదలగా ఇలా అంది. సానుకూల దృక్పథంతో ఆలోచిస్తే ప్రకృతి కూడా సహకరిస్తుంది. నాకు చెట్టుగా మారాలని ఆశగా ఉంది. అది పర్యావరణానికి, ప్రాణులకు మేలే కానీ కీడు కాదు. కాబట్టి నా కోరిక తీరుతుందని నమ్ముతున్నాను. ఇంతలోనే ఆ పిల్లవాడిని తల్లి గద్దించింది. మట్టిలో గింజలు ఉమ్మవద్దు. ఈ పళ్ళెంలో వెయ్యి. తినడం అయ్యాక అన్నీ ఆ చెత్తబుట్టలో వెయ్యి.. అంటూ ఒక పళ్ళెం ఇచ్చింది. ఇప్పుడేమంటావు చెప్పు? మన బతుకులు చెత్తబుట్ట పాలు. అంది నిరాశపరిచిన గింజ. మిగతా గింజలు అవునంటూ ఒప్పుకున్నాయి నీరసంగా.
మొదటి గింజ మౌనంగా ఉంది. ఒక నమ్మకంతో వేచి ఉంది. కాసేపటికి తినడం ముగించిన పిల్లవాడు ఆ రేగు గింజలను అమ్మ చెప్పినట్లే చెత్త బుట్టలో వేశాడు. మర్నాడు వీధులు శుభ్రం చేసేవారు వచ్చి అందరి ఇళ్ళలో చెత్తను సేకరించి, ఊరి బయటకు తరలించారు. ఆ క్రమంలో వాహనం కుదుపులకు కొన్ని గింజలు బండి సందులలో నుండి జారి, బాటపై పడ్డాయి. వాటిలో మొదటి గింజ కూడా ఉంది. ఆ బాట వెంట వెళ్ళే కొన్ని వాహన చక్రాలకు అంటుకుని తోటి గింజలు ఒక్కోటీ కనుమరుగైనాయి.
ఒక కాకి ఈ గింజను ముక్కున కరుచుకుని రివ్వున ఎగిరి ఒక భవనం గోడపై వాలింది. ముక్కుతో పొడిచి చూసి అందులో మిగిలి ఉన్న గుజ్జుని తిని, అక్కడే వదిలి ఎగిరిపోయింది. దాని రెక్కల వేగానికి గింజ దొర్లి కింద పడింది. మట్టిలో పడి అలా ఓర్పుగా వేచి చూస్తూ ఉంది. కొన్నాళ్ళకు ఎదురుచూసిన రోజు రానే వచ్చింది. పెద్ద వర్షం కురిసింది. ఎత్తులో ఉన్న కొంత మట్టి జారి పల్లంలో ఉన్న గింజను కప్పేసింది. మట్టిలో మునిగి, నీటితో తడిసి ఊపిరి పీల్చుకున్న గింజ కొద్ది రోజులకే మొలకై, తలెత్తి లోకాన్ని చూసింది.. సంతోషంగా నవ్వింది. గాలి దానిని హాయిగా నిమిరి అభినందనలు తెలిపింది.
