ప్రతి ఒక్కరూ జీవితంలో సంపద, శ్రేయస్సు కావాలని కోరుకోవడం సహజమే. అయితే చాలా సార్లు తెలిసి తెలియక చేసిన పొరపాట్లు వల్ల జీవితంలో సుఖ, సంతోషాలు దూరమై ఆర్థిక సమస్యలకు కారణమవుతాయి. ఫలితంగా ఎన్నో ఇబ్బందులు ఎదుర్కోవాల్సి వస్తుంది. వీటిని అధిగమించేందుకు ఏం చేయాలో వాస్తు శాస్త్రంలో సవివరంగా పొందుపరిచారు. ఈ విషయాలను జాగ్రత్తగా పట్టించుకుంటే ఆర్థిక ఇబ్బందులు అస్సుల తలెత్తువు. అంతేకాకుండా జీవితంలో ఆర్థిక ఇబ్బందులతో పాటు ఆరోగ్య సమస్యలు కూడా దరిచేరవు. ఈ నేపథ్యంలో జీవితంలో ధన సంబంధిత విషయాల్లో ఇబ్బందులెదురవకుండా ఉండాలంటే వాస్తు దోషాలు లేకుండా చూసుకోవాలి. లోపాలు ఎక్కడ ఉన్నాయో మీరు గుర్తిస్తే ఆ తప్పులు మళ్లీ చేయరు. మరి అవేంటో ఇప్పుడు చూద్దాం.
వాస్తుశాస్త్రం ప్రకారం పరిశుభ్రతపై ప్రత్యేక శ్రద్ధ పెట్టాల్సిన అవసరముంది. ఏ ఇల్లు అయితే పరిశుభ్రంగా ఉంటుందో ఆ ఇంట్లో లక్ష్మీ కలకాలం ఉంటుందని విశ్వసిస్తారు. అది ఇల్లు, బట్టలు మాత్రమే కాదు.. ఇంటి ఫ్లోరింగ్, పాదాలు కూడా శుభ్రంగా ఉండాలి. అలా ఉంటే అదృష్టం కలిసి వస్తుంది. కానీ చాలా మంది తమ ముఖాన్ని బాగుందా లేదా అని చూసుకుంటారు కానీ పాదాలపై దృష్టిపెట్టరు. వాస్తుశాస్త్రం ప్రకారం ఏ వ్యక్తి పాదాలైన మురికిగా ఉన్నట్లయితే వారి గౌరవం తగ్గుతుందని గుర్తుంచుకోవాలి. అంతేకాకుండా సమస్యలు కూడా ఎక్కువయ్యే అవకాశముంటుంది. వాస్తుశాస్త్రం ప్రకారం ఎప్పుడూ నీటికి సంబంధించిన ఫొటోలను షో-పీస్ కోసం వంట గదిలో ఉంచకూడదు. వంట గదిలో నీరు లేదా నీటికి సంబంధించిన వస్తువులు వంట గదిలో ఉంచడం శుభం కాదని నమ్ముతారు. షో-పీస్ లేదా నీటి చిత్రాన్ని వంటగదిలో ఉంచితే అశుభంగా భావిస్తారు. ఎందుకంటే ఇంట్లో కుటుంబ సభ్యులకు ఆరోగ్య సమస్యలు వెంటాడటమే కాకుండా ఆర్థిక ఇబ్బందులు కూడా ఎక్కువగా ఉంటాయి.
వాస్తుశాస్త్రం ప్రకారం ఉత్తర దిక్కున ఉన్న గోడ అల్మారాలో డబ్బులు ఎప్పుడూ దాచకూడదు. ఎందుకంటే ఆ అల్మారా దక్షిణానికి అభిముఖంగా ఉండటం వల్ల ఆర్థిక నష్టాన్ని కలగజేస్తుంది. కాబట్టి ఉత్తరదిక్కులో ఉన్న అల్మారాలో డబ్బును మర్చిపోయి కూడా దాచకూడదు. ఒకవేళ దాచుకోవాలంటే పడమటి దిక్కులో గోడకు ఉన్న అల్మారాలో ఉంచితే మంచి జరుగుతుంది. ఎందుకంటే ఈ అల్మారా తూర్పుకు అభిముఖంగా ఉంటుంది. ఫలితంగా వ్యక్తి జీవితంలో లక్ష్మీ కటాక్షం తాండవిస్తుంది. వాస్తుశాస్త్రం అనుసారం గణేశుడి విగ్రహం ఇంట్లో ఉంచితే ఆ వ్యక్తి ఎప్పుడూ డబ్బును కోల్పోడు. కాని కొంత మంది దీన్ని వేరే ఇతర దిక్కులో ఉంచుతారు. ఫలితంగా వాస్తుదోషం పెరగడమే కాకుండా ఆర్థిక ఇబ్బందులు పెరుగుతాయి. పలితంగా మానసిక ఒత్తిడి పెరుగుతుంది. అంతేకాకుండా సమాజంలో గౌరవాన్ని కోల్పోతారు. కాబట్టి మీరు గణేశుడి విగ్రహాన్ని ఇల్లు లేదా కార్యాలయంలో అభిముఖంగా ఉంచితే మంచి జరుగుతుంది. ఫలితంగా సంపద కూడా పెరుగుతుంది.
మీ జీవితంలో సంపదను కోల్పోతే ఇంట్లో నీటి కుండ ఏ స్థితిలో ఉందో పరిశీలించండి. వాస్తుశాస్త్రం ప్రకారం ఇంట్లో నీటి పాత్రను ఎల్లప్పుడూ ఈశాన్య దిశలోనే ఉంచాలి. ఇలా చేయడం వల్ల మీ కుటుంబ సభ్యుల దురదృష్టం దూరమవుతుంది. ఇదే సమయంలో సంపద కూడా పెరుగుతుంది. అంతేకాకుండా ఆరోగ్య సమస్యలు ఏమైనా ఉంటే తొలుగుతాయి. ఇంట్లో లక్ష్మీదేవి ఎల్లవేళలా ఉంటుంది. మానసిక ఒత్తిడి కూడా దూరమవుతుంది.
