Tomato Kothimeera Rice : మ‌నం చేసే వంట‌ల‌ను గార్నిష్ చేయ‌డానికి కొత్తిమీర‌ను ఎక్కువ‌గా ఉప‌యోగిస్తూ ఉంటాం. కొత్తిమీర‌ను వాడ‌డం వ‌ల్ల రుచితో పాటు ఆరోగ్యాన్ని కూడా పొంద‌వ‌చ్చ‌న్న సంగ‌తి కూడా మ‌న‌కు తెలిసిందే. అలాగే ఈ కొత్తిమీర‌తో రుచిగా ఉండే కొత్తిమీర రైస్ ను కూడా త‌యారు చేస్తూ ఉంటాం. వేడివేడిగా తింటే ఈ రైస్ చాలా రుచిగా ఉంటుంది. ఈ రైస్ ను మ‌రింత రుచిగా ట‌మాటాలు వేసి కూడా త‌యారు చేసుకోవ‌చ్చు. ట‌మాటాలు వేసి కొత్తిమీర రైస్ ను ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
ట‌మాట కొత్తిమీర రైస్ త‌యారీకి కావ‌ల్సిన ప‌దార్థాలు..
అన్నం – ఒక పెద్ద క‌ప్పు, త‌రిగిన ట‌మాటాలు – 3, కొత్తిమీర క‌ట్టలు – 4, త‌రిగిన ఉల్లిపాయ – 1, త‌రిగిన ప‌చ్చిమిర్చి – 2, బిర్యానీ ఆకు – 1, యాల‌కులు – 2, ల‌వంగాలు – 2, దాల్చిన చెక్క – ఒక ఇంచు ముక్క, జాపత్రి – 1, అల్లం వెల్లుల్లి పేస్ట్ – ఒక టీ స్పూన్, గ‌రం మ‌సాలా – అర టీ స్పూన్, ఉప్పు – త‌గినంత, నూనె – ఒక టేబుల్ స్పూన్, తాళింపు దినుసులు – ఒక టీ స్పూన్, క‌రివేపాకు – ఒక రెమ్మ, జీడిప‌ప్పు – 2 టేబుల్ స్పూన్స్, ప‌సుపు – అర టీ స్పూన్.
ట‌మాట కొత్తిమీర రైస్ త‌యారీ విధానం..
ముందుగా ఒక జార్ లో కొత్తిమీర‌ను, కొద్దిగా నీటిని తీసుకుని మెత్త‌ని పేస్ట్ లా చేసుకోవాలి. త‌రువాత క‌ళాయిలో నూనె వేసి వేడి చేయాలి. నూనె వేడ‌య్యాక తాళింపు దినుసులు, మ‌సాలా దినుసులు, జీడిప‌ప్పు వేసి వేయించాలి. ఇవి వేగిన త‌రువాత ఉల్లిపాయ ముక్క‌లు, ప‌చ్చిమిర్చి, క‌రివేపాకు వేసి వేయించాలి. త‌రువాత అల్లం పేస్ట్, ట‌మాట ముక్క‌లు, ఉప్పు వేసి క‌ల‌పాలి. త‌రువాత దీనిపై మూత పెట్టి ట‌మాట ముక్క‌లు మెత్త‌గా అయ్యే వ‌ర‌కు ఉడికించాలి. ట‌మాట ముక్క‌లు మెత్త‌గా ఉడికిన త‌రువాత ఇందులో మిక్సీ ప‌ట్టుకున్న కొత్తిమీర పేస్ట్, ప‌సుపు, గ‌రం మ‌సాలా వేసి మూడు నిమిషాల పాటు క‌లుపుతూ వేయించాలి. త‌రువాత అన్నం వేసి అంతా క‌లిసేలా బాగా క‌ల‌పాలి.
చివ‌ర‌గా కొత్తిమీర‌ను చ‌ల్లి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ట‌మాట కొత్తిమీర రైస్ త‌యార‌వుతుంది. దీనిని నేరుగా లేదా రైతాతో క‌లిపి తింటే చాలా రుచిగా ఉంటుంది. వంట చేయ‌డానికి స‌మ‌యం లేన‌ప్పుడు లేదా నోటికి రుచిగా ఏదైనా తినాల‌నిపించిన‌ప్పుడు ఇలా కొత్తిమీర‌తో రైస్ ను త‌యారు చేసుకుని తిన‌వ‌చ్చు.
