Tomato Ulligadda Karam : టమాటాలతో మనం ఎన్నో కూరలను తయారు చేసుకుంటూ ఉంటాం. టమాటాలతో చేసే కూరలు రుచిగా ఉండడంతో పాటు ఈ కూరలను తయారు చేయడం కూడా చాలా సులభం. టమాటాలతో చేసుకోదగిన రుచికరమైన వంటకాల్లో టమాట ఉల్లిగడ్డ కారం కూడా ఒకటి. సమయం తక్కువగా ఉన్నప్పుడు అప్పటికప్పుడు ఈ కూరను తయారు చేసుకుని తినవచ్చు. ఉల్లిగడ్డ కారం వేసి చేసే ఈ టమాట కూర చాలా రుచిగా ఉంటుంది. దీనిని చేయడం కూడా చాలా తేలిక. ఎంతో రుచిగా ఉండే టమాట ఉల్లిగడ్డ కారం కూరను ఎలా తయారు చేసుకోవాలి.. అన్న వివరాలను ఇప్పుడు తెలుసుకుందాం.
టమాట ఉల్లిగడ్డ కారం తయారీకి కావల్సిన పదార్థాలు..
ఉల్లిగడ్డలు – 2 ( మధ్యస్థంగా ఉన్నవి), తరిగిన టమాటాలు – 5, కారం – 3 టీ స్పూన్స్, ఉప్పు – తగినంత, తరిగిన పచ్చిమిర్చి – 2, కరివేపాకు – ఒక రెమ్మ, వెల్లుల్లి రెబ్బలు – 6, నూనె – 3 టేబుల్ స్పూన్స్, పసుపు – పావు టీ స్పూన్, తాళింపు దినుసులు – ఒక టేబుల్ స్పూన్, తరిగిన కొత్తిమీర – కొద్దిగా.
టమాట ఉల్లిగడ్డ కారం తయారీ విధానం..
ముందుగా జార్ లో ఉల్లిపాయ ముక్కలు, వెల్లుల్లి రెబ్బలు, ఉప్పు, కారం వేసి కచ్చా పచ్చాగా మిక్సీ పట్టుకోవాలి. తరువాత కళాయిలో నూనె వేసి వేడి చేయాలి. నూనె వేడయ్యాక తాళింపు దినుసులు వేసి వేయించాలి. తరువాత పచ్చిమిర్చి, కరివేపాకు వేసి వేయించాలి. తరువాత పసుపు వేసి కలపాలి. ఇప్పుడు మిక్సీ పట్టుకున్న ఉల్లిపాయ మిశ్రమం వేసి కలపాలి. దీనిని పచ్చి వాసన పోయే వరకు వేయించిన తరువాత టమాట ముక్కలు వేసి కలపాలి. తరువాత దీనిపై మూత పెట్టి టమాట ముక్కలు మెత్తబడే వరకు ఉడికించాలి. టమాట ముక్కలు మెత్తబడిన తరువాత కూరను మరోసారి కలపాలి.
ఇప్పుడు దీనిపై మూత పెట్టి చిన్న మంటపై నూనె పైకి తేలే వరకు ఉడికించాలి. చివరగా కొత్తిమీరను చల్లుకుని స్టవ్ ఆఫ్ చేసుకోవాలి. ఇలా చేయడం వల్ల ఎంతో రుచిగా ఉండే టమాట ఉల్లిగడ్డ కారం తయారవుతుంది. దీనిని అన్నం, చపాతీ, రోటీ వంటి వాటితో కలిపి తింటే చాలా రుచిగా ఉంటుంది. తరచూ చేసే టమాట కూర కంటే ఈ విధంగా చేసిన టమాట ఉల్లిగడ్డ కారం కూర మరింత రుచిగా ఉంటుంది. దీనిని అందరూ ఎంతో ఇష్టంగా తింటారు.
