Kanuga Aku : కానుగ చెట్టు.. ప్ర‌కృతి మనకు అందించిన అద్భుత‌మైన మొక్క‌ల్లో కానుగ చెట్టు ఒక‌టి. ఈ చెట్టు మ‌నంద‌రికి తెలిసిందే. రోడ్ల‌కు ఇరు వైపులా, గ్రామాల్లో, ప‌ట్ట‌ణాల్లో ఈ మొక్క మనకు విరివిరిగా క‌న‌బ‌డుతుంది. దాదాపు ఈ మొక్క‌ను చూడ‌ని వారు ఉండ‌ర‌నే చెప్ప‌వ‌చ్చు. పంట‌ల‌కు వ‌చ్చిన చీడ‌పీడ‌ల‌ను న‌శింప‌జేయ‌డంలో, గాలిని శుభ్ర‌ప‌ర‌చ‌డంలో, మనకు వ‌చ్చే అనారోగ్య స‌మ‌స్య‌ల‌ను న‌యం చేయ‌డంలో ఈ కానుగ చెట్టు మనకు ఎంతగానో ఉప‌యోగ‌ప‌డుతుంది. ఈ చెట్టు ప్ర‌తి భాగం కూడా ఎన్నో ఔష‌ధ గుణాల‌ను క‌లిగి ఉంటుంది. దీనిని వాడ‌డం వల్ల మ‌నం చ‌క్క‌టి ఆరోగ్యాన్ని సొంతం చేసుకోవ‌చ్చు. కానుగ చెట్టును సంస్కృతంలో క‌రంజ‌క, స‌ప్త‌మాల అని హిందీలో క‌రంజ అని పిలుస్తారు. ఎక్కువ‌గా నీడ కోసం ఈ చెట్టును పెంచుతారు.
ఈ చెట్టు చ‌ల్ల‌ని నీడ‌నే కాదు ఆరోగ్య‌వంత‌మైన గాలిని కూడా ఇస్తుంది. కానుగ ఆకులు కొద్దిగా గుండ్రంగా ఉంటాయి. అలాగే వీటి పూలు తెలుపు, నీలి రంగుల్లో ఉంటాయి. కానుగ గింజ‌లను ఎన్నో ఔష‌ధాల త‌యారీలో ఉప‌యోగిస్తారు. ఈ కానుగ గింజ‌ల నుండి నూనెను కూడా తీస్తారు. ఈ నూనెను పూర్వ‌కాలంలో దీపాలు వెల‌గించ‌డానికి ఉప‌యోగించేవారు. కానుగ చెట్టులో ఉండే ఔష‌ధ గుణాల గురించి అలాగే వీటిని ఎలా ఉప‌యోగించ‌డం వల్ల మ‌నం ప్ర‌యోజ‌నాల‌ను పొంద‌వ‌చ్చో ఇప్పుడు తెలుసుకుందాం. కానుగ చెట్టు ఆకుల‌ను, జిల్లేడు చెట్టు ఆకుల‌ను, జాజి చెట్టు ఆకుల‌ను స‌మానంగా తీసుకుని గో మూత్రంతో క‌లిపి మెత్త‌గా నూరాలి. ఈ మిశ్ర‌మాన్ని చ‌ర్మ సంబంధిత స‌మ‌స్య‌ల‌పై లేప‌నంగా రాయ‌డం వల్ల అన్ని ర‌కాల చ‌ర్మ స‌మ‌స్య‌లు త‌గ్గుతాయి.
3 గ్రాముల కానుగ గింజ‌ల పప్పును, 50 గ్రాముల ఆవు పాల‌ల్లోక‌లిపి తాగుతూ ఉంటే మూత్ర‌పిండాల్లో రాళ్ల స‌మ‌స్య కూడా త‌గ్గుతుంది. అలాగే 10 గ్రాముల కానుగ గింజ‌ల పప్పును, 10 గ్రాముల పిప్పిళ్ల‌ను, 5 గ్రాముల తుమ్మ జిగురును క‌లిపి నీటితో మెత్త‌గా నూరి శ‌న‌గ గింజ‌ల ప‌రిమాణంలో ఉండలుగా చేయాలి. వీటిని గాలికి ఆర‌బెట్టి నిల్వ చేసుకోవాలి. ఇలా త‌యారు చేసుకున్న మాత్ర‌ల‌ను పూట‌కు ఒక మాత్ర చొప్పున మూడు పూట‌లా ఇస్తూ ఉంటే అన్ని ర‌కాల జ్వ‌రాలు మూడు నుండి నాలుగు రోజుల్లో త‌గ్గుతాయి. కానుగ గింజ‌ల పప్పును పొడిగా చేసుకుని నిల్వ చేసుకోవాలి. ఈ పొడిని ఒక గ్రాము మోతాదులో అర టీ స్పూన్ తేనెతో క‌లిపి పిల్ల‌ల‌కు నెండు పూట‌లా ఇవ్వ‌డం వల్ల పిల్ల‌ల్లో వ‌చ్చే కోరింత ద‌గ్గు స‌మ‌స్య త‌గ్గుతుంది.
పురుషుల్లో వ‌చ్చే వృష‌ణాల వాపును త‌గ్గించ‌డంలో కూడా కానుగ చెట్టు మనకు ఉప‌యోగ‌ప‌డుతుంది. కానుగ గింజ‌ల పప్పును, గ‌చ్చ కాయ‌ల పప్పును, ఆముదం గింజ‌ల పప్పును స‌మానంగా తీసుకుని వంట ఆముదంతో క‌లిపి మెత్త‌గా నూరాలి. ఈ మిశ్ర‌మాన్ని రాత్రి ప‌డుకునే ముందు వృష‌ణాల మీద లేప‌నంగా రాసి ఉద‌యాన్నే క‌డిగి వేయాలి. ఇలా చేయ‌డం వల్ల వృష‌ణాల వాపు త‌గ్గుతుంది. కానుగ కాయ‌ల‌ను న‌ల్ల దారానికి దండ లాగా గుచ్చి పిల్ల‌ల మెడ‌లో వేయాలి. ఇలా చేయ‌డం వల్ల వారిలో కంటి చూపు మెరుగుప‌డుతుంది. అంతేకాకుండా వారికి అంటు వ్యాధులు కూడా రాకుండా ఉంటాయి. 2 గ్రాముల కానుగ గింజ‌ల ప‌ప్పు పొడిలో 10 గ్రాముల తేనెను క‌లిపి రెండు పూట‌లా తీసుకోవ‌డం వల్ల గొంతులో మంట, వాపు, కోరింత ద‌గ్గు వంటి స‌మ‌స్య‌లు త‌గ్గుతాయి. కానుగ పూల‌ను పొడిగా చేసే పూట‌ల‌కు 3 గ్రాముల పొడిని గోరు వెచ్చని నీటిలో క‌లిపి రెండు పూట‌లా తీసుకోవ‌డం వల్ల అతి మూత్రం, మూత్ర సంబంధిత స‌మ‌స్య‌లు, మూత్రాశ‌య ఇన్ఫెక్ష‌న్ లు వంటి స‌మ‌స్య‌లు త‌గ్గుతాయి.
కానుగ చెట్టు బెర‌డును మెత్త‌గా దంచి దానినుండి ర‌సాన్ని తీయాలి. ఈ ర‌సానికి స‌మానంగా వంట ఆముదాన్ని క‌లిపి చిన్న మంట‌పై కేవ‌లం నూనె మిగిలే వరకు వేడి చేయాలి. ఇలా త‌యారు చేసుకున్న నూనెను రెండు పూట‌లా ప‌క్ష‌వాతం వల్ల ప‌డిపోయిన శ‌రీర భాగాల‌పై రాసి మ‌ర్ద‌నా చేయాలి. ఇలా చేయ‌డం వల్ల ప‌డిపోయిన కాళ్లు, చేతులు కూడా తిరిగి ప‌ని చేస్తాయి. అయితే ఈ నూనె వాడే ప్ర‌తిసారి అది గోరు వెచ్చ‌గా ఉండేలా చూసుకోవాలి. కానుగ గింజ‌ల పప్పును నేతిలో వేసి న‌ల్ల‌గా అయ్యే వరకు వేయించాలి. త‌రువాత ఈ నెయ్యిని వ‌డ‌క‌ట్టి నిల్వ చేసుకోవాలి. ఈ నెయ్యిని రెండు లేదా మూడు చుక్క‌ల మోతాదులో గోరు వెచ్చ‌గా చెవిలో వేసుకుంటూ ఉండ‌డం వల్ల చెవుడు స‌మ‌స్య త‌గ్గుతుంది.
కానుగ చెట్టు లేత ఆకుల‌ను, రావి చెట్టు లేత ఆకుల‌ను స‌మానంగా తీసుకుని నీటిలో వేసి మ‌రిగించి క‌షాయంలా చేసుకోవాలి. ఈ క‌షాయాన్ని రెండు పూట‌లా తాగ‌డం వల్ల అరికాళ్ల‌ల్లో మంట‌లు వంటి స‌మ‌స్య‌లు త‌గ్గుతాయి. ఈ విధంగా కానుగ చెట్టు మనకు ఎంతో ఉప‌యోగ‌ప‌డుతుంద‌ని దీనిని వాడ‌డం వల్ల మ‌నం అనేక ర‌కాల అనారోగ్య స‌మ‌స్య‌ల‌ను దూరం చేసుకోవ‌చ్చ‌ని ఆయుర్వేద నిపుణులు చెబుతున్నారు.
