Kolhapuri Egg Masala Curry : ఉడికించిన కోడిగుడ్ల‌ను ఆహారంగా తీసుకోవ‌డం వ‌ల్ల మ‌న ఆరోగ్యానికి ఎంతో మేలు క‌లుగుతుంద‌న్న సంగ‌తి మ‌న‌కు తెలిసిందే. కోడిగుడ్డును ఉడికించి తీసుకోవ‌డం వ‌ల్ల శ‌రీరంలో రోగ నిరోధ‌క శ‌క్తి పెరుగుతుంది. ఎముక‌లు ధృడంగా త‌యార‌వుతాయి. మెద‌డు ఆరోగ్యం మెరుగుపడుతుంది. కండ‌రాలు ధృడంగా త‌యార‌వుతాయి. ఉడికించిన కోడిగుడ్డును నేరుగా తిన‌డంతో పాటు వీటితో మ‌నం ర‌క‌ర‌కాల కూర‌ల‌ను కూడా త‌యారు చేస్తూ ఉంటాం. ఉడికించిన కోడిగుడ్డుతో చేసిన వంట‌కాల‌ను తిన‌డం వ‌ల్ల రుచితో పాటు ఆరోగ్యానికి కూడా మేలు క‌లుగుతుంది. ఈ ఉడికించిన కోడిగుడ్ల‌తో ఎంతో రుచిగా ఉండే కొల్హాపూర్ ఎగ్ మ‌సాలా క‌ర్రీని ఎలా త‌యారు చేసుకోవాలి.. త‌యారీకి కావ‌ల్సిన ప‌దార్థాలు ఏమిటి.. అన్న వివ‌రాల‌ను ఇప్పుడు తెలుసుకుందాం.
కొల్హాపూర్ ఎగ్ మ‌సాలా కర్రీ త‌యారీకి కావ‌ల్సిన ప‌దార్థాలు..
ఉడికించిన కోడిగుడ్లు – 5, త‌రిగిన ట‌మాటాలు – 4, త‌రిగిన ఉల్లిపాయ‌లు – 2, కారం – ఒక టేబుల్ స్పూన్, ప‌సుపు – అర టీ స్పూన్, ఉప్పు – త‌గినంత, చింత‌పండు ర‌సం – ఒక టేబుల్ స్పూన్, నూనె – 3 టేబుల్ స్పూన్స్, క‌రివేపాకు – ఒక రెమ్మ, కొత్తిమీర – కొద్దిగా, ఎండుమిర్చి – 4.
మ‌సాలా పేస్ట్ కు కావ‌ల్సిన ప‌దార్థాలు..
బిర్యానీ ఆకులు – 2, ల‌వంగాలు – 3, అనాస పువ్వు – 1, సాజీరా – ఒక టీ స్పూన్, దాల్చిన చెక్క – ఒక ఇంచు ముక్క, మిరియాలు – పావు టీ స్పూన్, మెంతులు – 10, యాల‌కులు – 3, మ‌రాఠీ మొగ్గ – 1, జాప‌త్రి – 1, వాము – రెండు చిటికెలు, అల్లం వెల్లుల్లి పేస్ట్ – ఒక టేబుల్ స్పూన్, ప‌ల్లీలు – ఒక టేబుల్ స్పూన్, వెల్లుల్లి రెబ్బ‌లు – 8, ధ‌నియాలు – ఒక టేబుల్ స్పూన్, ఎండు కొబ్బ‌రి ముక్క‌లు – 2 టేబుల్ స్పూన్స్, జీల‌క‌ర్ర – ఒక టీ స్పూన్, నువ్వులు – ఒక టేబుల్ స్పూన్.
కొల్హాపూర్ ఎగ్ మ‌సాలా కర్రీ త‌యారీ విధానం..
ముందుగా క‌ళాయిలో మ‌సాలా దినుసులు వేసి వేయించాలి. వీటిని 5 నిమిషాల పాటు వేయించి ఒక జార్ లోకి తీసుకోవాలి. వీటిని మెత్త‌ని పొడిలా మిక్సీ ప‌ట్టుకుని గిన్నెలోకి తీసుకోవాలి. త‌రువాత అదే జార్ లో ట‌మాట ముక్క‌లు వేసి మెత్త‌గా మిక్సీ ప‌ట్టుకుని ప‌క్క‌కు ఉంచాలి. ఇప్పుడు క‌ళాయిలో నూనె వేసి వేడి చేయాలి. నూనె వేడ‌య్యాక ఎండుమిర్చి, క‌రివేపాకు వేసి వేయించాలి. త‌రువాత ఉల్లిపాయ ముక్క‌లు వేసి వేయించాలి. ఉల్లిపాయ ముక్క‌లు వేగిన త‌రువాత అల్లం వెల్లుల్లి పేస్ట్ వేసి ప‌చ్చి వాస‌న పోయే వ‌ర‌కు వేయించాలి. త‌రువాత ట‌మాట పేస్ట్, మ‌సాలా పొడి, ఉప్పు, ప‌సుపు, కారం వేసి క‌ల‌పాలి. దీనిని 2 నిమిషాల పాటు వేయించిన త‌రువాత వేయించిన కోడిగుడ్లు వేసి క‌ల‌పాలి.
త‌రువాత దీనిపై మూత పెట్టి నూనె పైకి తేలే వ‌ర‌కు వేయించాలి. త‌రువాత చింత‌పండు ర‌సం, ఒక గ్లాస్ నీళ్లు పోసి క‌ల‌పాలి. త‌రువాత దీనిపై మూత పెట్టి 10 నిమిషాల పాటు ఉడికించాలి. త‌రువాత కొత్తిమీర వేసి క‌లిపి స్ట‌వ్ ఆఫ్ చేసుకోవాలి. ఇలా చేయ‌డం వ‌ల్ల ఎంతో రుచిగా ఉండే ఎగ్ మ‌సాలా కర్రీ త‌యార‌వుతుంది. దీనిని అన్నంతో క‌లిపి తింటే చాలా రుచిగా ఉంటుంది. ఈ కొల్హాపూర్ ఎగ్ మ‌సాలా క‌ర్రీని అంద‌రూ ఎంతో ఇష్టంగా తింటారు. త‌ర‌చూ చేసే ఎగ్ క‌ర్రీల‌తో పాటు అప్పుడ‌ప్పుడూ ఇలా కూడా త‌యారు చేసుకుని తిన‌వ‌చ్చు.
