..నేనంటే నీకు ఇష్టమే కదూ?.. అనడిగిందా అమ్మాయి. కంగారుపడిపోయాను. సూటిగా అలా అడిగినప్పుడు అబ్బే లేదు అని చెప్పగలిగే వయసు కాదది. ఎన్ని రకాలుగా తల ఊపవచ్చో ఊపేసాను. ..గుడ్.. ఇక నుండి నేను నీ గాళ్ ఫ్రెండ్ ని.. నువ్ నా బాయ్ ఫ్రెండ్ వి.. అంటే ఏమిటో తెలియదు. తనకు మాత్రం అన్నీ తెలుసు. నాకన్నా నాలుగేళ్లు పెద్దది పైగా చురుకైనది. తనకు ఉన్న జ్ఞానంలో కొంచెం కూడా నాలో లేదని తెలుసు. మళ్ళీ తలూపాను. ..డబ్బులున్నాయా?.. అంది.. జేబులు వెతుక్కున్నాను. మూడు రూపాయలు ఉన్నాయి. తీసి ఇవ్వబోతుంటే – ..ఓయ్ నాకెందుకు.. పద సినిమాకి వెళదాం.. అంది. ..అన్ని డబ్బులు లేవుగా.. అన్నాను. ..ఇంట్లో కూడా లేవా?.. అని అడిగింది. ఉన్నాయని తలూపాను. ..వెళ్లి తీసుకుని రా.. అందామె. భయమేసింది. ఎప్పటి నుండో దాచుకున్న డబ్బులు. పైగా, సినిమాకి అప్పటి దాకా నాన్నతో వెళ్లడమే తెలుసు.
అసలు, పెద్దవాళ్ళు లేకుండా అలా ఎలా ఇద్దరమే సినిమాకి వెళ్తాం? ఎవరికైనా తెలిస్తే? గుండాగినట్టు అనిపించింది. ..ఆడపిల్లని, నేనే ధైర్యం చేస్తున్నా గా, నీకేం భయం?..అనగానే కిక్కురుమనలేదు. సినిమా హాల్ కి వెళ్లాం.. కాళ్ళు చేతులు విపరీతంగా వణికాయి. మా పెద్దవాళ్ళు ఎవరైనా చూస్తే – ఏరా స్కూల్ కి వెళ్లకుండా ఇక్కడేం చేస్తున్నావ్ అంటారేమో అని. అదృష్టం. ఖాళీగా ఉంది. ..నువ్వెళ్ళి మూడు టికెట్లు తీసుకుని రా.. అని ఒక కాయిన్ తీసుకుని ఫోన్ చేయడానికి వెళ్ళింది. నా అంతట నేను టికెట్లు తీసుకున్న అనుభవం లేదు. పెద్దలు ఎవరో ఒకరు ఉండేవారు. కౌంటర్ ఏమో నాకన్నా ఎత్తులో ఉంది. అసలు, మూడు ఎందుకు అని అడగడానికి మొహమాటం. టికెట్లు తీసుకున్నాం. కానీ లోపలికి వెళ్లలేదు. సినిమా లోపల స్టార్ట్ అయిపోయింది. సినిమా అంటే మొదటి నుండి చూడాలి అనుకునే అప్పటి సినిమా కక్కుర్తి బ్యాచ్ లో నేనూ ఒకడిని.
నాకన్నా కొంచెం వయసులో పెద్దవాడైన ఓ కుర్రాడు వచ్చాడు. అతడిని చూడగానే ఈ అమ్మాయి ముఖంలో కళ వచ్చింది. ..ఎవడీడు.. అనడిగాడు నన్ను తేరిపార చూస్తూ. ..మా పక్కింట్లో అబ్బాయి.. తమ్ముడేలే.. అంది.. ఎందుకు తెచ్చావ్.. అని అడిగాడు. ఇక్కడి దాకా ఒంటరిగా రావాలంటే ఇంట్లో వదులుతారా ఏంటి.. వీడితో అయితే ఎవరికీ అనుమానం రాదు.. అంది. నేను తమ్ముడు అనే దగ్గరే ఆగిపోయాను. బాయ్ ఫ్రెండ్ అంటే తమ్ముడని అప్పుడే అర్ధమైంది. వేరే ఏదో అర్ధం ఉందేమో అనుకున్నాను, ఇంకా నయం. విశ్లేషించడంలో ఎప్పుడూ ముందు ఉండేవాడిని. దాంతో ఇంకొంచెం ఆలోచించగా, బ్రదర్ అంటే తమ్ముడు కాబట్టి, బాయ్ ఫ్రెండ్ అంటే పక్కింట్లో ఉండే తమ్ముడని అర్ధం చేసుకున్నాను.
లోపలకు వెళ్లాక వాళ్ళ గుసగుసలు, చేతుల కదలికలు ఎక్కువవుతూ ఉంటే ఆ అమ్మాయి నా వైపు వంగి ..డబ్బులు ఉన్నాయిగా? ఏవైన తినడానికి పట్రా.. అంది. సినిమా మధ్యలో అలా ఎలా వదిలి వెళతాం? ఎప్పుడూ జరగలేదలా. కదలకపోతే..బాయ్ ఫ్రెండ్ అంటే గాళ్ ఫ్రండ్ చెప్పిన మాట వినాలి.. అంది కటువుగా. ఖర్మరా బాబూ అనుకుంటూ బయటకు వచ్చాను. అదిగో అప్పుడే తెలిసింది ఖర్మ అంటే ఏమిటో. బోలెడు డబ్బులు పోవడమే గాకుండా సినిమా కూడా సరిగా చూడనివ్వలేదు. కర్మ సిద్ధాంతం గురించి నాకు తెలియదు గానీ ఖర్మ సిద్ధాంతం గురించి బాగా తెలిసింది.
