Omicron Sub Variant : ప్ర‌పంచ వ్యాప్తంగా ప్ర‌స్తుతం క‌రోనా వైర‌స్ బెంబేలెత్తిస్తున్న విషయం విదిత‌మే. క‌రోనా వైర‌స్‌కు చెందిన ఒమిక్రాన్ వేరియెంట్ 200కు పైగా దేశాల్లో శ‌ర‌వేగంగా వ్యాప్తి చెందుతోంది. మ‌న దేశంలోనూ తాజాగా వ‌స్తున్నవ‌న్నీ ఒమిక్రాన్ వేరియెంట్ కేసులేన‌ని నిపుణులు కూడా చెబుతున్నారు. ఈ క్ర‌మంలోనే మ‌రింత ఆందోళ‌న‌కు గురిచేస్తున్న వార్త ఒక‌టి బ‌య‌ట‌కు వ‌చ్చింది. ఒమిక్రాన్ వేరియెంట్‌కు గాను స‌బ్‌వేరియెంట్ త‌యారైంది. దీన్ని ప‌లు దేశాల్లో గుర్తించామ‌ని నిపుణులు తెలిపారు.
డెన్మార్క్‌లోని స్టాటెన్స్ సీర‌మ్ ఇనిస్టిట్యూట్ (ఎస్ఎస్ఐ)కు చెందిన ప‌రిశోధ‌కులు తాజాగా చేసిన అధ్య‌య‌నాల్లో ఒమిక్రాన్ వేరియెంట్‌కు గాను స‌బ్ వేరియెంట్‌ను గుర్తించారు. దానికి బీఎ.2 గా నామ‌క‌ర‌ణం చేశారు. ఒమిక్రాన్‌కు బీఏ.1 గా నామ‌క‌ర‌ణం చేయ‌గా.. ఇప్పుడు వ‌చ్చింది దాని స‌బ్ వేరియెంట్ కావ‌డం విశేషం. ఇక బీఏ.2 వేరియెంట్ గురించి నిపుణులు షాకింగ్ విష‌యాల‌ను వెల్ల‌డించారు.
బీఏ.2 వేరియెంట్ ఒమిక్రాన్ క‌న్నా ఎక్కువ వేగంగా వ్యాప్తి చెందుతుంద‌ని నిపుణులు తెలిపారు. మెడ్ ఆర్ఎక్స్ఐవీ అనే వెబ్‌సైట్‌లో ఈ కొత్త వేరియెంట్‌కు చెందిన అధ్య‌య‌న వివ‌రాల‌ను ప్ర‌చురించారు. బీఏ.2 వేరియెంట్ ఒక‌రి నుంచి మ‌రొక‌రికి శ‌ర‌వేగంగా వ్యాప్తి చెందుతుంద‌ని తెలిపారు. మ‌న శ‌రీరంలో ఉండే రోగ నిరోధ‌క శ‌క్తిని సైతం మార్చివేయ‌గ‌ల శ‌క్తి బీఏ.2కు ఉంద‌ని తెలిపారు. అంటే మ‌న శ‌రీర రోగ నిరోధ‌క శ‌క్తి నుంచి సైతం బీఏ.2 వేరియెంట్ త‌ప్పించుకోగ‌ల‌ద‌న్న‌మాట. ఇది ఆందోళ‌న క‌లిగించే విష‌య‌మ‌ని అంటున్నారు.
బీఏ.1 (ఒమిక్రాన్) వ్యాప్తి రేటు 29 శాతంగా ఉండ‌గా.. బీఏ.2 వ్యాప్తి రేటు 39 శాతంగా ఉంద‌ని తెలిపారు. అంటే ఒమిక్రాన్ క‌న్నా బీఏ.2 వేరియెంట్ మ‌రింత వేగంగా వ్యాప్తి చెందుతున్న‌ట్లు అర్థ‌మ‌వుతుంద‌ని అన్నారు. ఇలాంటి స్థితిలో క‌రోనా వ్యాక్సిన్ తీసుకోని వారిలో ఈ వేరియెంట్ మ‌రింత వేగంగా వ్యాప్తి చెందుతుంద‌ని అన్నారు. క‌నుక ప్ర‌తి ఒక్క‌రూ త‌ప్ప‌నిస‌రిగా కోవిడ్ టీకా తీసుకోవాల‌ని, క‌రోనా ప‌ట్ల జాగ్ర‌త్త‌ల‌ను పాటించాల‌ని నిపుణులు హెచ్చ‌రిస్తున్నారు.
