పండ్లు.. కూరగాయలు.. ఏ రకానికి చెందిన పండులో అయినా.. కూరగాయల్లో అయినా.. అనేక పోషకాలు ఉంటాయి. ఒక్కో రకమైన పండు లేదా కూరగాయతో మనకు భిన్న విధాలైన ప్రయోజనాలు కలుగుతాయి. అందుకనే అనేక రకాల పండ్లు, కూరగాయలను నిత్యం తినాలని వైద్యులు సూచిస్తుంటారు. అయితే ఆరోగ్యంగా ఉండాలంటే అన్ని రకాల పండ్లు, కూరగాయలను నిత్యం తినాల్సిన పనిలేదు. 2 రకాల పండ్లు, 3 రకాల కూరగాయలను నిత్యం తీసుకుంటే చాలు.. ఆరోగ్యంగా ఉండవచ్చు. అలాగే వ్యాధులు రాకుండా ఉంటాయి. ఎక్కువ కాలం జీవించవచ్చు. అలా అని మేం చెప్పడం లేదు. సైంటిస్టులు చేపట్టిన తాజా అధ్యయనాలు ఈ విషయాన్ని వెల్లడించాయి.
అమెరికన్ హార్ట్ అసోసియేషన్‌కు చెందిన సర్క్యులేషన్‌ అనే జర్నల్‌లో సైంటిస్టులు సుదీర్ఘకాలం పాటు చేపట్టిన ఓ అధ్యయనానికి చెందిన వివరాలను తాజాగా ప్రచురించారు. వాటి ప్రకారం.. నిత్యం ఏవైనా 2 రకాల పండ్లు, 3 రకాల కూరగాయలను తీసుకుంటే చాలు.. ఎక్కువ ఏళ్ల పాటు జీవించవచ్చు. అలాగే గుండె జబ్బులు వచ్చే అవకాశాలు 12 శాతం తగ్గుతాయి. క్యాన్సర్ వచ్చే ప్రమాదం 10 శాతం వరకు, శ్వాసకోశ సమస్యలు వచ్చే అవకాశాలు 35 శాతం వరకు తగ్గుతాయి. సైంటిస్టులు దాదాపుగా 30 ఏళ్ల పాటు ఉత్తర, దక్షిణ అమెరికా, ఐరోపా, ఆసియా, ఆస్ట్రేలియా ఖండాల్లోని దేశాలకు చెందిన సుమారుగా 20 లక్షల మందిపై అధ్యయనాలు చేసి తాజాగా ఈ వివరాలను వెల్లడించారు.
ఈ క్రమంలోనే నిత్యం ఏవైనా సరే.. 2 రకాల పండ్లు, 3 రకాల కూరగాయలను తినాలని సైంటిస్టులు సూచిస్తున్నారు. ఇక అమెరికన్ హార్ట్ అసోసియేషన్‌కు చెందిన ప్రొఫెసర్‌ అన్నె థార్న్‌డికె అయితే.. మనం చేసే భోజనంలో సగం వరకు ప్లేట్‌ను పండ్లు, కూరగాయలతో నింపాలని సూచించారు. నిత్యం ఏవైనా 2 రకాల సిట్రస్‌ (నిమ్మజాతి) పండ్లను తింటే ఇంకా ఎక్కువ ప్రయోజనం ఉంటుందని తెలిపారు.
